ஸ்ரீவிலி.யில் தலைவர்கள் படங்களுக்கு அவமரியாதை: பதற்றம்

ஸ்ரீவில்லிபுத்தூரில் இரு தலைவர்களின் படங்கள் திங்கள்கிழமை அவமரியாதை செய்யப்பட்டதையடுத்து, இரு தரப்பினர் கொடுத்த புகாரின் பேரில் போலீஸார் வழக்குப் பதிவு செய்து விசாரித்து வருகின்றனர். இதனால் இங்கு பதற்றம் ஏற்பட்டுள்ளது.
ஸ்ரீவில்லிபுத்தூர், வன்னியம்பட்டி விலக்கில் மாஞ்சோலை ஆட்டோ தொழிலாளர் சங்கம் என்ற பெயர் பலகையுடன் ஆட்டோ நிலையம் உள்ளது. இந்த போர்டில் புதிய தமிழகம் கட்சித் தலைவர் டாக்டர் கிருஷ்ணசாமியின் படம் உண்டு. திங்கள்கிழமை கொத்தங்குளத்தைச் சேர்ந்த சிலர் தேவர் குருபூஜைக்கான டிஜிட்டல் போர்டு வைக்க வந்த போது ஆட்டோ ஸ்டாண்டில் உள்ள பெயர் பலகையில் செருப்பை கட்டி போட்டு விட்டார்களாம். இது குறித்து ஆட்டோ ஸ்டாண்டு தலைவர் ரஜினி வன்னியம்பட்டி காவல் நிலையத்தில் கொடுத்த புகாரின் பேரில் போலீஸார் வழக்குப் பதிவு செய்து விசாரித்து வருகின்றனர்.
ஸ்ரீவில்லிபுத்தூரில் தேவர் குருபூஜைக்காக நகர் முழுவதும் எவ்வித அனுமதியும் இன்றி பொது மக்களுக்கு இடையூறாக பல்வேறு இடங்களில் முக்குலத்தேவர் புலிப்படை என்ற பெயரில் டிஜிட்டல் போர்டுகள் வைக்கப்பட்டிருந்தது. ராமகிருஷ்ணாபுரம், காமராஜர் சிலை அருகே வைக்கப்பட்டிருந்த போர்டில் யாரோ செருப்புகளை போட்டுச் சென்று விட்டார்களாம். இது குறித்து சந்தனக்குமார் என்பவர் ஸ்ரீவில்லிபுத்தூர் நகர் காவல் நிலையத்தில் கொடுத்த புகாரின் பேரில் போலீஸார் வழக்குப் பதிவு செய்து விசாரித்து வருகின்றனர்.
இச் சம்பவங்களை அடுத்து நகரில் பல்வேறு பகுதிகளில் போலீஸார் தீவிர கண்காணிப்பு மற்றும் ரோந்துப் பணியில் ஈடுபட்டுள்ளனர்.