ஸ்ரீவில்லிபுத்தூர் : கொலை வழக்கில் குற்றவாளிக்கு 10 ஆண்டு கடுங்காவல் சிறை

விருதுநகர் மாவட்டம், ஸ்ரீவில்லிபுத்தூர் அருகே ஒருவரை வெட்டிக் கொலை செய்த வழக்கில், குற்றவாளிக்கு 10 ஆண்டுகள் கடுங்காவல் சிறைத் தண்டனையும் ரூ.5 ஆயிரம் அபராதமும் விதித்து ஸ்ரீவில்லிபுத்தூரில் உள்ள மாவட்ட முதன்மை அமர்வு நீதிமன்றத்தில் புதன்கிழமை தீர்ப்பு வழங்கப்பட்டது.

ஸ்ரீவில்லிபுத்தூர் அருகேயுள்ள மம்சாபுரம்-நரையன்குளம் கிராமத்தைச் சேர்ந்தவர் சோலைராஜ் (40). இவருக்கு இசக்கியம்மாள் என்ற மனைவியும் மகன்களும் உண்டு. 11.9.2008 அன்று சோலைராஜ், ஊர் நாட்டாமை முனியாண்டியிடம் புரட்டாசி பொங்கல் வரி வசூல் தொடர்பாக பேசிக் கொண்டிருந்துள்ளார். கடந்த ஆண்டு வெளியூரில் இருந்து வந்து இங்கு குடியிருந்து வருபவர்களிடம் வரி வசூல் செய்யவில்லை என்றும், இந்த ஆண்டு அப்படி இல்லாமல் எல்லாரிடமும் பொங்கலுக்கு வரி வசூல் செய்ய வேண்டும் என்றும் சோலைராஜ் கூறியுள்ளார்.

அப்போது அருகில் இருந்த பொய்ப்புலி (எ) முனியாண்டி (35) என்பவர், சோலைராஜ் இவ்வாறு கூறியது தொடர்பாக தகராறு செய்துள்ளார். இதில் ஏற்பட்ட பிரச்னையில் பொய்ப்புலி (எ) முனியாண்டி, சோலைராஜை வெட்டியுள்ளார். ஸ்ரீவில்லிபுத்தூர் அரசு மருத்துவமனையில் அனுமதிக்கப்பட்டு, மேல் சிகிச்சைக்காக மதுரை அரசு மருத்துவமனையில் அனுமதிக்கப்பட்ட சோலைராஜ் சிகிச்சை பலனின்றி 12.9.2008-ம் தேதி உயிரிழந்தார்.

மம்சாபுரம் போலீஸார் வழக்குப் பதிவு செய்து, பொய்புலி (எ) முனியாண்டியை கைது செய்து ஸ்ரீவில்லிபுத்தூரில் உள்ள மாவட்ட முதன்மை அமர்வு நீதிமன்றத்தில் வழக்குத் தொடர்ந்தனர். வழக்கை விசாரித்த நீதிபதி பி.எஸ்.ஆவடி தியாகராஜமூர்த்தி, பொய்புலி (எ) முனியாண்டிக்கு 10 ஆண்டுகள் கடுங்காவல் சிறைத் தண்டனையும், ரூ.5 ஆயிரம் அபராதமும் விதித்துத் தீர்ப்புக் கூறினார்.