நெல்லையில் கரியமாணிக்கப் பெருமாள் கோயில் தேரோட்டம்

திருநெல்வேலி நகரத்தில் உள்ள கரியமாணிக்கப் பெருமாள் கோயில் தேரோட்டம் வெள்ளிக்கிழமை நடைபெற்றது.இக் கோயிலில் பங்குனி உற்சவம் மார்ச் 26-ம் தேதி கொடியேற்றத்துடன் தொடங்கியது. தொடர்ந்து திருவிழா நாள்களில் அன்ன வாகனம், சிம்ம வாகனம், ஹனுமந்த வாகனம், சேஷ வாகனத்தில் சுவாமி எழுந்தருளி பக்தர்களுக்கு அருள்பாலித்தார். மார்ச் 30-ம் தேதி கருடசேவையும், சிறப்பு திருமஞ்சனமும் நடைபெற்றது.அதற்கு மறுநாள் 6-ம் திருநாளில் வெள்ளை யானை வாகனத்திலும், 7-ம் திருநாளில் இந்திர விமானத்திலும், 8-ம் திருநாளில் குதிரை வாகனத்திலும், 9-ம் திருநாளில் சந்திரபிரபை வாகனத்திலும் சுவாமி எழுந்தருளி வீதியுலா வந்தார்.

10-ம் திருநாளான வெள்ளிக்கிழமை காலையில் சுவாமிக்கு சிறப்பு அபிஷேகம், அலங்காரம் நடைபெற்றது. அதன்பின்பு சுவாமி தேருக்கு எழுந்தருளினார். அங்கு சிறப்புத் தீபாராதனை முடிந்ததும், கோவிந்தா-கோபாலா என்ற பக்தி முழக்கங்களுடன் பக்தர்கள் தேரை வடம்பிடித்து இழுத்துச் சென்றனர். ஒரு மணி நேரத்தில் தேர் நிலையை அடைந்தது. தேரோட்டத்தையொட்டி பக்தர்களுக்கு மோர், பானக்காரம், குளிர்பானங்களை பொதுமக்கள் விநியோகித்தனர்.

11-ம் திருநாளான சனிக்கிழமை (ஏப்.5) குறுக்குத்துறையில் வைத்து காலையில் தீர்த்தவாரியும்,  மாலையில் பல்லக்கில் சுவாமி வீதியுலாவும் நடைபெறுகின்றன. 12-ம் திருநாளான ஞாயிற்றுக்கிழமை (ஏப்.6) கலசமாற்று பூஜையும், சந்திரபிரபை வாகனத்தில் சுவாமி வீதியுலாவும் நடைபெறுகிறது. திங்கள்கிழமை (ஏப்.7) மாலையில் ஊஞ்சல் உற்சவம் நடைபெறுகிறது. செவ்வாய்க்கிழமை (ஏப்.8) ராமநவமியையொட்டி சுவாமிக்கு சிறப்பு திருமஞ்சனம் நடைபெறுகிறது. மாலையில் ஹனுமந்தவாகனத்தில் சுவாமி திருவீதியுலா வருகிறார்.