கடலூர் அருகே விடுதலைச் சிறுத்தைகள் கொடிக்கம்பம் உடைப்பு: சாலைமறியல்

கடலூர் அருகே விடுதலைச் சிறுத்தைகள் கட்சி கொடிக் கம்பங்களை சேதப் படுத்தியவர்கள் மீது நடவடிக்கை எடுக்கக் கோரி சாலைமறியல் போராட்டம் புதன்கிழமை நடைபெற்றது.

கடலூர் வட்டம் விலங்கல்பட்டு மற்றும் நடுவீரப்பட்டு ஆகிய இடங்களில் விடுதலை சிறுத்தைகள் கட்சி கொடிக் கம்பத்தை செவ்வாய்கிழமை இரவு மர்ம நபர்கள் சிலர் உடைத்து சேதப்படுத்தியதாக தெரிகிறது. சேதப்படுத்தியதை கண்டித்தும், குற்றவாளிகளை உடன் கைது செய்ய வலியுறுத்தியும் விடுதலை சிறுத்தைகள் கட்சி சார்பில் நடுவீரப்பட்டில் மாவட்டச் செயலாளர் பா.தாமரைச்செல்வன் தலைமையில் சாலைமறியல் போராட்டம் நடைபெற்றது.

சம்பவ இடத்திற்கு போலீலார் சென்று பேச்சுவார்த்தை நடத்தி கொடிக்கம்பம் உடைத்தவர்கள் மீது நடவடிக்கை எடுக்கப்படும் என உறுதியளித்ததை அடுத்து போராட்டம் வாபஸ் பெறப்பட்டது. சாலைமறியல் போராட்டத்தில் மாவட்ட துணைச்செயலர் ஸ்ரீதர், ஒன்றியச் செயலர் சக்திவேல் உள்ளிட்ட திரளானோர் கலந்து கொண்டனர்.

ஆட்சியரிடம் புகார்: இச்சம்பவம் குறித்து விடுதலை சிறுத்தைகள் கட்சி மாவட்டச் செயலாளர் பா.தாமரைசெல்வன் புதன்கிழமை மாவட்ட ஆட்சியர் எஸ்.சுரேஷ்குமாரிடம் புகார் மனு கொடுத்துள்ளார். அம்மனுவில் மர்ம மனிதர்கள் சிலர் சாதி கலவரத்தை தூண்டும் விதமாக தொடர்ந்து விடுதலை சிறுத்தைகள் கட்சியின் கொடிக்கம்பங்களை சேதப்படுத்தி வருகின்றனர். கடலூர் வட்டத்தில் இதுவரை 7 முறை கொடிக்கம்பம் உடைக்கப்பட்டுள்ளது. காவல்துறை இதுவரை எந்த நடவடிக்கையும் எடுக்கவில்லை, கடலூர் மாவட்டத்தில் சட்டம் ஒழுங்கை சீர்குலைக்கும் விதமாக செயல்படும் சமூகவிரோதிகள் மீது நடவடிக்கை எடுக்க வேண்டும் என அந்த மனுவில தாமரைச்செல்வன் தெரிவித்துள்ளார்.