ஸ்ரீவில்லிபுத்தூர் ஸ்ரீஆண்டாள் ஆடிப்பூர பெருவிழா: கொடியேற்றத்துடன் தொடக்கம்

விருதுநகர் மாவட்டம், ஸ்ரீவில்லிபுத்தூர், ஸ்ரீஆண்டாள் திருஆடிப்பூர பெருவிழா செவ்வாய்கிழமை கொடியேற்றத்துடன் தொடங்கியது. விழாவின் முக்கிய நிகழ்ச்சியான தேரோட்டம் 30-ம் தேதி (புதன்கிழமை) நடைபெறுகிறது.

பூமிப்பிராட்டியாம் ஸ்ரீஆண்டாளின் திருஅவதார தினமான ஆடிப்பூர நன்நாளைக் கொண்டாடும் விதமாக, ஸ்ரீஆண்டாள் திருஆடிப்பூர பெருவிழா 22-ம் தேதி (செவ்வாய்க் கிழமை) காலை 7 மணிக்கு கொடியேற்றத்துடன் தொடங்கியது. காலை சுவாமிகள் புறப்பாடு நடைபெற்று சிங்கம்மாள் குறடு மண்டபம், வானமாமலை மடம் ஆகிய இரு மண்டபங்களில் எழுந்தருளுகிறார்கள். இரவு ஸ்ரீஆண்டாள், ரெங்கமன்னார் சேர்த்தியில் பதினாறு வண்டிச் சப்பரத்தில் வீதி உலா வருகிறார்கள்.10 நாள்கள் நடைபெறும் இந்தப் பெருவிழாவில், 5-ம் திருநாளான 26-ம் தேதி (சனிக்கிழமை) ஐந்து கருடசேவை நடைபெறுகிறது.

அப்போது ஸ்ரீஆண்டாள் பெரிய அன்ன வாகனத்திலும், ஸ்ரீரெங்கமன்னார், ஸ்ரீபெரிய பெருமாள், ஸ்ரீசுந்தராஜன், ஸ்ரீதிருவேங்கடமுடையான், ஸ்ரீதிருத்தங்கால் அப்பன் ஆகியோர் பெரிய திருவடி (கெருட) வாகனங்களிலும், ஸ்ரீபெரியாழ்வர் சிறிய அன்னவாகனத்திலும் எழுந்தருளி பக்தர்களுக்கு அருள்பாலிப்பர்.

7-ம் திருநாளான 28-ம் தேதி (திங்கள்கிழமை) இரவு கிருஷ்ணன்கோவிலில் சயன சேவை நடைபெறும். ஸ்ரீஆண்டாள் திருமடியில் ஸ்ரீரெங்கமன்னார் சயனத் திருக்கோலத்தில் பக்தர்களுக்கு அருள்பாலிப்பார்.

9-ம் திருநாளான 30-ம் தேதி (புதன்கிழமை) காலை 9.05 மணிக்கு விழாவின் முக்கிய நிகழ்ச்சியான தேரோட்டம் நடைபெறுகிறது.

 கொடியேற்றத்தையொட்டி, ஸ்ரீஆண்டாள், ரெங்கமன்னாருக்கு விசேஷ பூஜைகள் மற்றும் அலங்காரம் நடைபெற்றது. பின்னர் கொடி, மாட வீதிகளின் வழியே வீதி உலாவாகக் கொண்டு வரப்பட்டது. கொடிமரத்தில் விசேஷ பூஜைகள் மற்றும் ஆராதனை நடைபெற்றது, தொடர்ந்து விஜயபாஸ்கரபட்டர், ஸ்தானிகம் ரமேஷ் (எ) ரெங்கராஜன் ஆகியோர் கொடியேற்றினர்.

நிகழ்ச்சியில் கோயில் தக்கார் தொழிலதிபர் கே.ரவிச்சந்திரன் உள்பட ஏராளமான பக்தர்கள் கலந்து கொண்டனர்.திருவிழா நாட்களின் ஆண்டாள் சந்நிதி முன்பு அமைக்கப்பட்டுள்ள பிரமாண்ட பந்தலில் பல்வேறு இன்னிசைக் கச்சேரிகள், நாட்டிய நிகழ்சிகள், சொற்பொழிவுகள் நடைபெறுகிறது.

விழாவிற்கான ஏற்பாடுகளை கோயில் தக்கார் கே.ரவிச்சந்திரன் விரிவாகச் செய்துள்ளார். விழாவில் நாட்டின் பல்வேறு பகுதிகளில் இருந்தும், வெளி நாடுகளில் இருந்தும் ஏராளமான பக்தர்கள் வருகைபுரிந்து சுவாமி தரிசனம் செய்வார்கள். இதற்காக  போலீஸார் தீவிர கண்காணிப்பு மற்றும் பாதுகாப்புப் பணியில் தற்போது ஈடுபட்டுள்ளனர்.