பேரவைக் கூட்டத்தில் மதுவிலக்கு குறித்து அறிவிக்க வேண்டும்: மு.க.ஸ்டாலின் வலியுறுத்தல்

மதுவிலக்கை அமல்படுத்தும் அறிவிப்பை வரும் சட்டப்பேரவைக் கூட்டத்தில் அறிவிக்க வேண்டும் என்று திமுக பொருளாளர் மு.க.ஸ்டாலின் வலியுறுத்தியுள்ளார்.  கொளத்தூரில் பேசலாம் வாங்க நிகழ்ச்சியில் ஞாயிற்றுக்கிழமை ஸ்டாலின் பங்கேற்றார். இந்த நிகழ்ச்சிக்குப் பிறகு அவர் அளித்த பேட்டி:

கேள்வி: பேரவையில் தொகுதி பிரச்னைகள் பற்றி பேசுவீர்களா

பதில்: பேரவையில் தமிழகப் பிரச்னைகளைப் பற்றி பேசுவதற்கு வாய்ப்பு கிடைப்பது இல்லை. அத்தி பூத்தாற்போல் சட்டப்பேரவையைக் கூட்டியுள்ளனர். இந்தக் கூட்டம் எவ்வளவு நாள்கள் நடக்கிறது என்று தெரியவில்லை. ஜனநாயக முறைப்படி பேச அனுமதித்தால், மக்கள் பிரச்னைகளைப் பற்றி பேசுவோம்.

கே: தேமுதிக எம்.எல்.ஏ.க்கள் பேரவையில் பங்கேற்க குரல் கொடுப்பீர்களா

 ப: ஏற்கெனவே குரல் கொடுத்துவிட்டோம். அது நீதிமன்றம் வரை போயிருக்கிறது. தொடர்ந்து குரல் கொடுப்போம்.

கே: மதுவிலக்கு தொடர்பாக சட்டப்பேரவை கூட்டத்தில் அறிவிக்க வாய்ப்பு உண்டா

 ப: மதுவிலக்கை சுதந்திர தினத்தில் அறிவித்தால் சட்டப்பேரவை கூடும் நேரத்தில் அறிவித்துவிட்டார்களே என்று பிரச்னை எழலாம் என முதல்வர் ஜெயலலிதா நினைத்திருக்கலாம். அதன் காரணமாக அறிவிக்காமல் விட்டிருக்கலாம். சட்டப்பேரவைக் கூட்டத்தில் அறிவிக்கக் கூடும். அப்படி அறிவித்தால் வரவேற்கத் தயார் என்று அவர் கூறியுள்ளார்.