குடிநீர் தட்டுபாடு எதிரொலி பாபநாசம், மணிமுத்தாறு அணைகளில் 300 கனஅடி தண்ணீர் திறப்பு

திருநெல்வேலி மாவட்டத்தில் எழுந்துள்ள குடிநீர் தட்டுபாட்டை போக்கும் வகையில் பாபநாசம், மணிமுத்தாறு அணைகளில் இருந்து திறக்கப்படும் நீரின் அளவு 300 கனஅடியாக அதிகரிக்கப்பட்டுள்ளது.

வடகிழக்குப் பருவத்தில் இயல்பான அளவைவிட 62 சதவீதம் மழை குறைவாக பெய்ததால் திருநெல்வேலி மாவட்டத்தில் அணைகளின் நீர்மட்டம் எதிர்பார்த்தவாறு உயரவில்லை. 

அணைகளின் நீர்இருப்பு வெகுவாக குறைந்து காணப்படுவதால் அணைகளில் இருந்து 100 கனஅடி மட்டும் திறந்து விடப்படுவதால் இம்மாவட்டத்தில் குடிநீர் விநியோகம் பாதிக்கப்பட்டுள்ளது. 

தாமிரவருணி ஆற்றில் அமைந்துள்ள குடிநீர் திட்டங்களில் இருந்து ஓரளவு குடிநீர் விநியோகம் செய்யப்பட்டு வரும் சூழலில் திருநெல்வேலி மாநகரில் தட்டுபாடு எழுந்துள்ளது.

கடனாநதி, ராமநதி உள்ளிட்ட அணைகளில் இருந்து குடிநீர் தேவைக்கு தண்ணீர் திறக்கப்படாததால் பரவலாக குடிநீர் விநியோகம் பாதி்க்கப்பட்டு்ள்ளது. கடையம், பாப்பாக்குடி, அம்பாசமுத்திரம், சேரன்மகாதேவி ஆகிய ஒன்றியங்களில் 200 க்கும் மேற்பட்ட கிராமங்களில் விநியோகம் முற்றிலும் பாதிக்கப்பட்டு்ள்ளது.

இதனிடையே இம்மாவட்டத்தில் எழுந்துள்ள குடிநீர் தட்டுபாட்டை போக்கும் வகையில் பாபநாசம், மணிமுத்தாறு அணைகளில் இருந்து திறக்கப்படும் நீரின் அளவு 300 கனஅடியாக அதிகரிக்கப்பட்டுள்ளது.

ஞாயிற்றுக்கிழமை நிலவரப்படி பாபநாசம் அணைக்கு விநாடிக்கு 95.60 கனஅடியும், மணிமுத்தாறு அணைக்கு விநாடிக்கு 26 கனஅடியும் நீர்வரத்து இருந்தது. பிற அணைகளுக்கு நீர்வரத்து இல்லை.

பாபநாசம் அணையின் நீர்ம்ட்டம் 25.40 அடி, சேர்வலாறு அணையின் நீர்மட்டம் 61.19 அடி, மணிமுத்தாறு அணையின் நீர்மட்டம் 36.14 அடி, கடனாநதி அணையின் நீர்மட்டம் 48.30 அடி, ராமநதி அணையின் நீர்மட்டம 37.50 அடி, கருப்பாநதி அணையின் நீர்மட்டம் 46.23 அடி, 

குண்டாறு அணையின் நீர்மட்டம் 22.12 அடி, அடவிநயினார் அணையின் நீர்மட்டம் 67 அடி, வடக்குப் பச்சையாறு அணையின் நீர்மட்டம் 3.25 அடி, நம்பியாறு அணையின் நீர்மட்டம் 9.41 அடி, கொடுமுடியாறு அணையின் நீர்மட்டம் 10 அடியாகவும் இருந்தது.