அத்திக்கடவு - அவிநாசி திட்டம்: ஆக. 17-ல் முதல்வர் தொடங்கிவைக்கிறார்!

அத்திக்கடவு - அவிநாசி நீர்ப்பாசன திட்டத்தை ஆக. 17 ஆம் தேதி முதல்வர் மு.க. ஸ்டாலின் தொடங்கிவைக்கிறார்.

காணொலி காட்சி வாயிலாக முதல்வர் தொடங்கிவைக்க உள்ளதாக வீட்டுவசதி மற்றும் நகா்ப்புற வளா்ச்சித் துறை அமைச்சா் சு.முத்துசாமி தகவல் தெரிவித்துள்ளார்.

அத்திக்கடவு- அவிநாசி திட்டத்தை நிறைவேற்ற வலியுறுத்தி வரும் ஆகஸ்ட் 20-ஆம் தேதி உண்ணாவிரதப் போராட்டம் நடைபெறும் என்று பாஜக மாநிலத் தலைவா் கே.அண்ணாமலை அறிவித்து இருந்தார்.

முன்னதாக, அண்ணாமலையின் உண்ணாவிரதப் போராட்டத்திற்கு விளக்கமளித்த அமைச்சா் சு.முத்துசாமி, "விதிகளின்படிதான் இத்திட்டத்தை செயல்படுத்த முடியும். கீழ்பவானி பாசனத்துக்கு தண்ணீா் திறந்துவிட்ட பிறகு, காலிங்கராயன் தடுப்பணைக்கு கசிவுநீா் வந்தபிறகு கண்டிப்பாக அத்திக்கடவு-அவிநாசி திட்டம் முழுமையாக செயல்பாட்டுக்கு வரும். வரும் 15-ஆம் தேதி கீழ்பவானி கால்வாயில் தண்ணீா் திறக்கப்பட உள்ளது. பின்னா், 10 நாள்களுக்குப் பின் காலிங்கராயன் தடுப்பணைக்கு கசிவுநீா் வந்த பிறகு அத்திக்கடவு-அவிநாசி திட்டத்திற்கு தண்ணீா் எடுக்க ஏற்பாடு செய்யப்படும்" என்று தெரிவித்து இருந்தார்.

இந்த நிலையில், அத்திக்கடவு - அவிநாசி நீர்ப்பாசன திட்டத்தை ஆக. 17 ஆம் தேதி முதல்வர் மு.க. ஸ்டாலின் தொடங்கிவைக்க உள்ளதாக அமைச்சர் முத்துசாமி தகவல் தெரிவித்துள்ளார்.