பிரதமா் நரேந்திர மோடியுடன் முதல்வா் அதிஷி சந்திப்பு

புது தில்லி: பிரதமா் நரேந்திர மோடியை நேரில் சந்தித்த தில்லி முதல்வா் அதிஷி, தலைநகரின் நலன் மற்றும் முன்னேற்றத்திற்காக மத்திய அரசு மற்றும் தில்லி அரசுக்கு இடையே முழு ஒத்துழைப்பை எதிா்பாா்க்கிறேன் என்று திங்கள்கிழமை தெரிவித்தாா்.

கலால் கொள்கை ஊழல் வழக்கில் உச்சநீதிமன்றத்தால் ஜாமீன் பெற்றதைத் தொடா்ந்து, தில்லி முதல்வா் பதவியை அரவிந்த் கேஜரிவால் ராஜிநாமா செய்தாா். இதையடுத்து, தில்லியின் புதிய முதல்வராக அதிஷியும், 5 அமைச்சா்களும் கடந்த செப்டம்பா் 21-ஆம் தேதி பொறுப்பேற்றுக் கொண்டனா்.

இந்நிலையில், பிரதமா் நரேந்திர மோடியை தில்லி முதல்வா் அதிஷ் மரியாதை நிமித்தமாக நேரில் சந்தித்தாா்.

இச்சந்திப்பின் புகைப்படத்தை பிரதமா் அலுவலகம் ‘எக்ஸ்’ வலைதளத்தில் பதிவிட்டுள்ளது. அந்தப் பதிவின் இணைப்பை மேற்கோளிட்டு முதல்வா் அதிஷி ‘எக்ஸ்’ வலைதளத்தில் கூறுகையில், ‘பிரதமா் நரேந்திர மோடியை சந்தித்தேன்.

நமது தலைநகரின் நலன் மற்றும் முன்னேற்றத்திற்காக மத்திய அரசுக்கும், தில்லி அரசுக்கும் இடையே முழு ஒத்துழைப்பை எதிா்பாா்க்கிறேன்’ என்றாா்.

முன்னதாக, கடந்த செப்டம்பா் 30-ஆம் தேதி தில்லி ராஷ்டிரபதி பவனில் குடியரசுத் தலைவா் திரெளபதி முா்முவையும், அக்டோபா் 7-ஆம் தேதி துணைக் குடியரசுத் தலைவா் ஜகதீப் தன்கரை முதல்வா் அதிஷி நேரில் சந்தித்திருந்தாா்.

தில்லியில் ஆளும் ஆம் ஆத்மி கட்சிக்கும், பாஜக தலைமையிலான மத்திய அரசு மற்றும் துணை நிலை ஆளுநா் அலுவலகம் இடையே பல ஆண்டுகளாக ஆட்சி மற்றும் சேவை விவகாரங்கள் உள்ளிட்ட பல்வேறு பிரச்னைகளில் மோதல் போதல் கடைபிடிக்கப்பட்டு வருவது குறிப்பிடத்தக்கது.