வைத்தீஸ்வரன் கோயிலில் ஆடிக் கிருத்திகை சிறப்பு வழிபாடு

நாகை மாவட்டம், சீர்காழி அருகேயுள்ள வைத்தீஸ்வரன்கோயில் வைத்தியநாதசுவாமி கோயிலில் ஆடிக் கிருத்திகையையொட்டி சிறப்பு வழிபாடு திங்கள்கிழமை நடைபெற்றது.
தருமபுரம் ஆதீனத்துக்குச் சொந்தமான இக்கோயிலில் அருள்மிகு தையல்நாயகி அம்மன் சமேத வைத்தியநாதர் சுவாமி அருள்பாலிக்கிறார்.
மேலும் செல்வமுத்துக்குமார சுவாமி, நவகிரகங்களில் செவ்வாய்க்குரிய அதிபதியான அங்காரகன், தன்வந்திரி ஆகிய சுவாமிகள் தனித்தனி சன்னிதிகளில் அருள்பாலிக்கின்றனர்.
இக்கோயிலில் ஆடிக் கிருத்திகையையொட்டி, செல்வமுத்துக்குமார சுவாமிக்கு சிறப்பு வழிபாடு நடைபெற்றது. முன்னதாக, யதாஸ்தானத்திலிருந்து வள்ளி, தெய்வானை உடனாகிய செல்வமுத்துக்குமார சுவாமி கிருத்திகை மண்டபத்துக்கு எழுந்தருளினார். அங்கு, சுவாமிக்கு 51 வகையான பொருள்களைக் கொண்டு மகா அபிஷேகம் நடைபெற்றது. தொடர்ந்து, நவரத்தின அங்கி, மலர்களால் அலங்காரம் செய்யப்பட்டது. பின்னர், சிவாச்சாரியார்கள் சண்முகாஅர்ச்சனையுடன், தீபாராதனை காட்டினர். இதில், ஆயிரக்கணக்கான பக்தர்கள் பங்கேற்று சுவாமி தரிசனம் செய்தனர். மேலும், இந்த வழிபாட்டில் தருமபுரம் ஆதீன இளைய சந்நிதானம் ஸ்ரீலஸ்ரீ மாசிலாமணி தேசிக ஞானசம்பந்த சுவாமிகள் பங்கேற்று, பக்தர்களுக்கு அருளாசி வழங்கினார்.