திருமலையில் சக்கரத்தாழ்வாருக்கு தீர்த்தவாரி

திருமலையில் புதன்கிழமை காலை திருக்குளத்தில் சக்கரத்தாழ்வாருக்கு தீர்த்தவாரி நடைபெற்றது.
திருமலையில், ஆண்டுதோறும் வைகுண்ட துவாதசி அன்று காலை தீர்த்தவாரி நடைபெறுவது வழக்கம். அதன்படி புதன்கிழமை வைகுண்ட துவாதசியை முன்னிட்டு, அதிகாலை 4.30 மணியளவில் ஏழுமலையான் கோயிலிருந்து சக்கரத்தாழ்வாரை திருக்குளக்கரையில் உள்ள வராகஸ்வாமி கோயிலுக்கு எழுந்தருளச் செய்தனர்.
அதைத் தொடர்ந்து ஸ்நபன திருமஞ்சனம் மற்றும் திருக்குளத்தில் தீர்த்தவாரி உள்ளிட்டவை 5.30 மணி வரை நடைபெற்றன. இதில் தேவஸ்தான அதிகாரிகள் கலந்து கொண்டனர். திருமலையில் உள்ள ஸ்ரீவாரி திருக்குளத்தில் 66 ஆயிரம் கோடி தீர்த்தங்கள் இணைந்திருப்பதாக புராணங்கள் கூறுகின்றன. அதனால் திருக்குளத்தில் புனித நீராடினால் 66 ஆயிரம் தீர்த்தங்களில் நீராடிய பலன் கிடைக்கும் என்பதால் கடும் குளிரையும் பொருட்படுத்தாமல் ஆயிரக்கணக்கான பக்தர்கள் திருக்குளத்தில் புனித நீராடினர்.