4 -ஆம் நாள் தெப்போற்சவம்: யானை வாகனத்தில் பத்மாவதி தாயார் பவனி

திருச்சானூர் பத்மாவதி தாயார் கோயில் வருடாந்திர தெப்போற்சவத்தையொட்டி செவ்வாய்க்கிழமை யானை வாகனத்தில் தாயார் மாட வீதியில் வலம் வந்தார்.
திருச்சானூர் பத்மாவதி தாயார் கோயிலில் வருடாந்திர தெப்போற்சவம் சனிக்கிழமை தொடங்கியது. 
அதன் 4-ஆம் நாளான செவ்வாய்க்கிழமை மதியம் 3 முதல் 5 மணி வரை பத்மாவதி தாயாருக்கு நீராழி மண்டபத்தில் பல வகையான அபிஷேக பொருள்களால் ஸ்நபன திருமஞ்சனம் நடைபெற்றது. மாலை 6.30 மணிக்கு பத்மசரோவரம் திருக்குளத்தில் பத்மாவதி தாயார் திருக்குளத்தில் ஏற்படுத்திய தெப்பத்தில் 5 முறை வலம் வந்தார். 
நூற்றுக்கணக்கான பக்தர்கள் குளக்கரையில் அமர்ந்து தெப்பம் அருகில் வரும் போது ஆரத்தி அளித்து வணங்கினர். தெப்போற்சவம் முடிந்த பின், தாயார் தனக்கு மிகவும் விருப்பமான யானை வாகனத்தில் மாட வீதியில் வலம் வந்தார். யானை வாகன சேவையைக் காண பக்தர்கள் மாட வீதியில் திரண்டனர்.
தெப்போற்சவத்தையொட்டி, திருக்குளம் முழுவதும் மலர்களாலும், மின் விளக்குகளாலும் அழகுற அலங்கரிக்கப்பட்டது. மேலும் தெப்போற்சவத்தைக் காண வரும் பக்தர்களுக்காக திருக்குளத்தில் கதாகாலட்சேபம், நாட்டியாஞ்சலி உள்ளிட்ட ஆன்மிக நிகழ்ச்சிகளும் தேவஸ்தானம் நடத்தியது. இதில் தேவஸ்தான அதிகாரிகள் கலந்து கொண்டனர். தெப்போற்சவத்தை முன்னிட்டு, தாயார் கோயிலில் சில ஆர்ஜித சேவைகளை கோயில் நிர்வாகம் ரத்து செய்தது. புதன்கிழமையுடன் தெப்போற்வம் நிறைவு பெறுகிறது.