திருப்பதியில் பக்தா்கள் சாலை மறியல்

திருப்பதியில் உள்ள விஷ்ணு நிவாசம் விடுதிக்கு எதிரில் பக்தா்கள் சாலையில் அமா்ந்து மறியல் நடத்தினா்.

ஏழுமலையானை தரிசிக்க வரும் பக்தா்களுக்காக தேவஸ்தானம் திருப்பதியில் உள்ள சீனிவாசம், விஷ்ணுநிவாசம், பூதேவி காம்ப்ளக்ஸ் உள்ளிட்ட விடுதிகளில் சா்வ தரிசன டோக்கன்களை வழங்கி வருகிறது. வார நாள்களில் 7,000 டோக்கன்களும், வார இறுதி நாள்களில் 8,000 டோக்கன்களும் வழங்கப்படுகின்றன.

ஒரு நாளுக்கான தரிசன டோக்கன்கள் தீரும்பட்சத்தில், தொலை தூரத்திலிருந்து வந்து காத்திருக்கும் பக்தா்களுக்காக மறு நாளுக்கான டோக்கன்கள் முன்கூட்டியே அளிக்கப்படுகின்றன.

இந்நிலையில், வரும் 22, 23 மற்றும் 24 உள்ளிட்ட தேதிகளுக்கான டோக்கன்கள் திங்கள்கிழமையே (டிசம்பா் 21) வழங்கப்படும் என்று தேவஸ்தானம் அறிவித்திருந்தது. அன்று மாலையுடன் திருப்பதியில் உள்ள சா்வ தரிசன கவுன்ட்டா்கள் மூடப்படும் என்றும் தெரிவிக்கப்பட்டது.

வைகுண்ட ஏகாதசியின்போது (டிசம்பா் 25 முதல் ஜனவரி 3-ஆம் தேதி வரை) திருப்பதியில் வசிக்கும் உள்ளூா்வாசிகளுக்கு மட்டும், பொது முடக்க விதிமுறைகளைப் பின்பற்றி நேர ஒதுக்கீடு டோக்கன்கள் வழங்கப்படும் என்று தெரிவிக்கப்பட்டிருந்தது.

இந்நிலையில், ஞாயிற்றுக்கிழமை காலையில் அதிக அளவிலான பக்தா்கள் திருமலைக்கு வந்தனா். அவா்களுக்கு தேவஸ்தானம் 24-ஆம் தேதி தரிசனத்துக்கான டோக்கன்களை வழங்கியது. அதற்கு பக்தா்கள் ‘அடுத்த நான்கு தினங்களுக்கு நாங்கள் எங்கு தங்குவது?’ என்று கேள்வி எழுப்பி, திருப்பதி ரயில் நிலையம் எதிரில் உள்ள விஷ்ணு நிவாசம் விடுதி முன்பு சாலையில் அமா்ந்து மறியலில் ஈடுபட்டனா்.

இதுகுறித்து தகவல் அறிந்த தேவஸ்தான அதிகாரிகள் அப்பகுதிக்குச் சென்றனா். ‘டிசம்பா் 21, 22 மற்றும் 23 ஆகிய தேதிகளுக்கான தரிசன டோக்கன்கள் வழங்கப்பட்டு விட்டன. எனவேதான், 24-ஆம் தேதிக்கான தரிசன டோக்கன்கள் வழங்கப்படுகின்றன’ என்று கூறி பக்தா்களை சமாதானப்படுத்தினா். அதை ஏற்று பக்தா்கள் மறியலைக் கைவிட்டு, கலைந்து சென்றனா்.