திருமுருகன்பூண்டி திருமுருகநாதசுவாமி கோயில் தேரோட்டம் கொடியேற்றத்துடன் தொடக்கம்!

அவிநாசி: திருமுருகன்பூண்டி, திருமுருகநாதசுவாமி கோயில் தேரோட்டம் கொடியேற்றத்துடன் ஞாயிற்றுக்கிழமை தொடங்கியது.

கொங்கு ஏழு சிவஸ்தலங்களில் ஒன்றாகவும், மனநோய் தீர்க்கும் திருத்தலமாகவும் திருமுருகன்பூண்டி திருமுருகநாதசுவாமி கோயில் விளங்குகிறது.

இக்கோயில் தேர்த்திருவிழா ஆண்டு தோறும் கோலகலமாக நடைபெற்று வருகிறது. இந்தாண்டு ஞாயிற்றுக்கிழமை காலை கொடியேற்றத்துடன் துவங்கியது. இதில், சிறப்பு ஹோமம் நடைபெற்றது.

இதைத்தொடர்ந்து அலங்கரிக்கப்பட்ட சுவாமியின் கொடியை எடுத்து கோயிலுக்குள் பிரகார உலாவந்து வேத மந்திரங்கள், வாத்தியங்கள் முழங்க, கொடியேற்றப்பட்டது.

இதன்பிறகு, உற்சவ மூர்த்திகள் பிரகார உலா, பஞ்சமூர்த்திகள் திருவீதி உலா ஆகியவை நடைபெற்றது. பிப்ரவரி 19ம் தேதி மாலையில், சூரிய, சந்திர மண்டலக்காட்சிகள், 20ம்தேதி பூதவாகன, சிம்ம வாகனக்காட்சிகள், 21ம் தேதி புஷ்ப வாகனக் காட்சிகளும், 22ம் தேதி பஞ்சமூர்த்திகளுடன் ரிஷப வாகனக்காட்சிகளும், 23ம்தேதி யானை வாகன, அன்னவாகன காட்சிகளும், சுவாமி திருக்கல்யாண உற்சவம் ஆகிய நிகழ்ச்சிகள்நடைபெறவுள்ளது.

இதையடுத்து, 24 ஆம் தேதி சனிக்கிழமை அதிகாலை விநாயகர், சண்முகநாதர், திருமுருகநாதர்சுவாமி, அம்பாள், சண்டிகேசுவரர் ஆகிய பஞ்சமூர்த்திகள் திருத்தேருக்கு எழுந்தருளல் நிகழ்ச்சி நடைபெறுகிறது.

முக்கிய நிகழ்ச்சியாக சனிக்கிழமை மாலை 3 மணிக்கு திருத்தேர் வடம் பிடித்து இழுத்தல் தேரோட்டம் நிகழ்ச்சி நடைபெறுகிறது. 25ஆம் தேதி மாலை மீண்டும் தேரோட்டம் நடைபெறுகிறது. 26ஆம் தேதி தெப்பத்தேர் உற்சவம் நிகழ்ச்சியும், 27ஆம் தேதி ஸ்ரீசுந்தரர் வேடுபறி திருவிழா நடைபெறுகிறது. 28 ஆம் தேதி பிரம்மதாண்டவ தரிசனக் காட்சியும், 29 ஆம் தேதி மஞ்சள் நீர் திருவிழா, மயில் வாகனக்காட்சி ஆகியவற்றுடன் தேர்த் திருவிழா நிகழ்ச்சி நிறைவு பெறுகிறது.