கோவில்பட்டியில் நடைபெற்று வரும் அகில இந்திய ஹாக்கி போட்டியில் 2-வது நாளான சனிக்கிழமை நடைபெற்ற ஆட்டத்தில் இந்தியன் வங்கி 5-0 என்ற கோல் கணக்கில் ஜார்க்கண்ட் போலீஸ் அணியை வீழ்த்தியது. அந்த அணியின் ராஜா 4 கோல்களை அடித்தார்.
கே.ஆர். கல்வி நிறுவனங்கள் மற்றும் கே.ஆர்.மருத்துவ அறக்கட்டளை சார்பில் லட்சுமி அம்மாள் நினைவு கோப்பைக்கான 5-வது அகில இந்திய ஹாக்கி போட்டி கோவில்பட்டி லட்சுமி அம்மாள் பாலிடெக்னிக் கல்லூரியில் நடைபெற்று வருகிறது.
கோவில்பட்டி அணி வெற்றி: இதில், முதல் நாளான வெள்ளிக்கிழமை நடைபெற்ற கோவில்பட்டி லட்சுமி அம்மாள் நினைவு ஹாக்கி அணி-ஆந்திர ஆர்.டி.டி. ஹாக்கி அகாதெமி அணி இடையிலான ஆட்டம் மழையால் பாதிக்கப்பட்டது. அப்போது கோவில்பட்டி அணி 2-0 என்ற கோல் கணக்கில் முன்னிலையில் இருந்தது.
அந்த ஆட்டம் 2-வது நாளான சனிக்கிழமை தொடர்ந்து நடைபெற்றது. அதில், கோவில்பட்டி அணி வீரர் செட்ரிக் இரு கோல்களை அடித்தார். இதன்பிறகு ஆந்திர அணிக்கு ஒரு கோல் கிடைத்தது. அந்த அணியின் அக்ரம்பாஷா இந்த கோலை அடித்தார். இறுதியில் கோவில்பட்டி அணி 4-1 என்ற கோல் கணக்கில் வெற்றி கண்டது.
பின்னர் நடைபெற்ற 2-வது ஆட்டத்தில் பெங்களூர் கனரா வங்கி அணி 3-0 என்ற கோல் கணக்கில் சென்னை நகர காவல் அணியை வீழ்த்தியது.
இந்தியன் வங்கி வெற்றி: 3-வது ஆட்டத்தில் சென்னை இந்தியன் வங்கி அணியும், ஜார்க்கண்ட் போலீஸ் அணியும் மோதின. இதில் இந்தியன் வங்கி ஆரம்பம் முதலே அபாரமாக விளையாடியது. அதனால் ஆட்டத்தின் 3-வது நிமிடத்தில் பெனால்டி கார்னர் வாய்ப்பின் மூலம் கோலடித்த இந்தியன் வங்கி வீரர் ராஜா, 8-வது நிமிடத்தில் இரண்டாவது கோலை அடித்தார்.
இதைத்தொடர்ந்து 9-வது நிமிடத்தில் 3-வது கோலை அடித்தது இந்தியன் வங்கி. இந்த கோலை பிலிப்மார்டீன் அடித்தார். இதனால் அந்த அணி முதல் பாதி ஆட்டநேர முடிவில் 3-0 என்ற கோல் கணக்கில் முன்னிலை பெற்றது.
பின்னர் நடைபெற்ற 2-வது பாதி ஆட்டத்திலும் இந்தியன் வங்கி அணியே ஆதிக்கம் செலுத்தியது. அந்த அணியின் ராஜா மீண்டும் இரு கோல்களை (61 மற்றும் 69-வது நிமிடம்) அடித்தார். இதனால் இந்தியன் வங்கி அணி 5-0 என்ற கோல் கணக்கில் ஜார்க்கண்டை தோற்கடித்தது. இதில் 4 கோல்களை அடித்த ராஜா, ஆட்டத்தை தன் வசமாக்கினார்.
இன்றைய ஆட்டங்கள்
போபால் ஹாக்கி அகாதெமி-
சென்னை வருமான வரித் துறை
போட்டி நேரம்: காலை 6.30
தமிழ்நாடு லெவன்-
கேரள ஹாக்கி அணி
போட்டி நேரம்: காலை 8
ஐ.சி.எஃப்.-
பெங்களூர் பிரைன் ரோஸ்
போட்டி நேரம்: பிற்பகல் 2.30
ஹாக்கி ஆந்திரம்-
சென்னை தெற்கு ரயில்வே
போட்டி நேரம்: மாலை 4.30