போக்குவரத்து பாதிப்பால் தாமதமாகும் இங்கிலாந்து - மே.இ.தீ. போட்டி!

போக்குவரத்து பாதிப்பால் இங்கிலாந்து - மே.இ.தீ. அணிகளுக்கு இடையேயான கடைசி ஒருநாள் போட்டி தாமதமாகியுள்ளது.

இங்கிலாந்துக்கு சுற்றுப் பயணம் செய்துள்ள மே.இ.தீ. அணி 3 ஒருநாள், 3டி20 போட்டிகளில் விளையாடுகிறது. இதில் 2 ஒருநாள் போட்டிகள் முடிவடைந்துள்ள நிலையில் கடைசி போட்டி இன்று ஓவல் திடலில் நடைபெற இருந்தது.

இந்தப் போட்டிக்கு வந்துகொண்டிருந்த மே.இ.தீ. அணி கடுமையான போக்குவரத்து பாதிப்பில் சிக்கிக் கொண்டதால் 30 நிமிஷங்கள் போட்டி தாமதமாகியுள்ளது.

இங்கிலாந்து அணி ஏற்கனவே இந்தத் தொடரில் 2-0 என வெற்றி பெற்றுள்ளது. கடைசி போட்டியிலும் வென்று 3-0 என ஒயிட்வாஷ் செய்யும் முனைப்பில் இங்கிலாந்து அணி பயிற்சியில் ஈடுபட்டு வருகிறது.

ஜாஸ் பட்லர் கேப்டன் பொறுப்பில் இருந்து விலகிய பிறகு ஹாரி புரூக் கேப்டனாக செயல்பட்டு வருகிறார். இவரது தலைமையில் முதல் தொடரிலேயே பல சாதனைகளை செய்து வருகிறது.

அடுத்ததாக, இவ்விரு அணிகளுக்கான டி20 போட்டிகள் ஜூன்.6 ஆம் தேதி தொடங்குகிறது.