ஜூனியர் தடகளம்: புதிதாக 3 சாதனைகள்

ஆந்திர பிரதேச மாநிலம் விஜயவாடாவில் நடைபெற்று வரும் தேசிய ஜூனியர் தடகள சாம்பியன்ஷிப் போட்டியில் புதிதாக 3 தேசிய சாதனைகள் எட்டப்பட்டன.
18 வயதுக்கு உள்பட்ட சிறுமிகளுக்கான உயரம் தாண்டுதலில் ஹரியாணாவின் ருபீனா யாதவ் 1.81 மீட்டர் உயரம் தாண்டி தங்கம் வென்றார். முன்னதாக, மேற்கு வங்கத்தின் ஸ்வப்னா பர்மன் கடந்த 2013-இல் 1.71 மீட்டர் தாண்டியதே சாதனையாக இருந்தது.
14 வயதுக்கு உள்பட்ட சிறுவர்களுக்கான நீளம் தாண்டுதல் போட்டியில் பிகாரின் அவினாஷ் குமார் 6.79 மீட்டர் தாண்டி சாதனை படைத்தார். முன்னதாக, ஒடிஸாவின் சுனாராம் முர்மு கடந்த 2008-ஆம் ஆண்டு 6.63 மீட்டர் தாண்டியதே அதிகபட்சமாக இருந்தது.
16 வயதுக்கு உள்பட்ட சிறுமிகளுக்கான ஈட்டி எறிதலில் ஹரியாணாவின் ஜோதி 41.24 மீட்டர் தூரம் எறிந்து தங்கம் வென்றார். முன்னதாக, தமிழகத்தின் ஹேமமாலினி கடந்த 2015-ஆம் ஆண்டு 39.69 மீட்டர் தூரம் எறிந்ததே சாதனையாக இருந்தது.