சென்னை வெற்றி: தில்லி போராடி தோல்வி

சென்னை அணிக்கு எதிரான ஆட்டத்தில் கடுமையாக போராடியும் 13 ரன்கள் வித்தியாசத்தில் தில்லி அணி தோல்வியடைந்தது.
தில்லி டேர் டெவில்ஸ், சென்னை சூப்பர் கிங்ஸ் அணிகள் இடையிலான ஐபிஎல் 30-வது ஆட்டம் புணேவில் திங்கள்கிழமை இரவு நடைபெற்றது. 
புள்ளிகள் பட்டியலில் இரண்டாம் இடத்தில் சென்னையும், கடைசி இடத்தில் தில்லி அணியும் உள்ளன. முன்னதாக டாஸ் வென்ற தில்லி அமி பீல்டிங்கை தேர்வு செய்தது. இதையடுத்து சென்னையின் ஷேன் வாட்சன்-டு பிளெஸிஸ் ஆகியோர் தொடக்க வீரர்களாக களமிறங்கினர். இருவரும் முதல் விக்கெட்டுக்கு இணைந்து அதிரடியாக ரன் குவிப்பில் ஈடுபட்டனர். டு பிளெஸிஸ் 33 ரன்களிலும், சுரேஷ் ரெய்னா ரன் ஏதுமின்றியும் வீழ்ந்தனர். 7 சிக்ஸர், 4 பவுண்டரியுடன் 40 பந்துகளில் 78 ரன்களை குவித்த நிலையில் வாட்சன் ஆட்டமிழந்தார். ராயுடு 41 ரன்களில் வீழ்ந்தார். கேப்டன் தோனி 5 சிக்ஸர், 2 பவுண்டரியுடன், 22 பந்துகளில் 51 ரன்களை குவித்து ஆட்டமிழக்காமல் இருந்தார். 20-வது ஓவர் முடிவில் 4 விக்கெட் இழப்புக்கு சென்னை அணி 211 ரன்களை எடுத்திருந்தது. தில்லி தரப்பில் அமித் மிஸ்ரா, விஜய் சங்கர், மேக்ஸ்வேல் ஆகியோர் தலா 1 விக்கெட்டை வீழ்த்தினர்.
212 ரன்கள் எடுத்தால் வெற்றி என்ற இமாலய இலக்குடன் தில்லி அணியின் பிரித்வி ஷா, காலின் மன்றோ தொடக்க வீரர்களாக களமிறங்கினர். 9 ரன்கள் மட்டுமே எடுத்த நிலையில் பிரித்வி, ஆசிப் பந்து வீச்சில் ஆட்டமிழந்தார். பின்னர் காலின் மன்றோவுடன்-கேப்டன் ஷ்ரேயஸ் ஐயர் இணைந்து விளையாடினார்.
மன்றோ 26 ரன்களிலும், ஷ்ரேயஸ் ஐயர் 13 ரன்களிலும் ஆட்டமிழந்தனர். அதிரடி வீரர் மேக்ஸ்வெல் 6 ரன்களில் ஜடேஜா பந்தில் போல்டானார். பின்னர் ரிஷப் பந்த்-விஜய் சங்கர் இணைந்து நிதானமாக ரன்களை குவிக்கத் தொடங்கினர். 
ரிஷப் பந்த், விஜய் சங்கர் அரை சதம் வீண்: ரிஷப் பந்த் 4 சிக்ஸர், 7 பவுண்டரியுடன் 45 பந்துகளில் 79 ரன்கள் எடுத்திருந்த நிலையில் ஆட்டமிழந்தார். விஜய் சங்கர் 5 சிக்ஸர், 1 பவுண்டரியுடன் 31 பந்துகளில் 54 ரன்களுடனும், ராகுல் 3 ரன்களுடனும் இறுதி வரை ஆட்டமிழக்காமல் இருந்தனர்.
20-வது ஓவர் முடிவில் தில்லி அணி 5 விக்கெட்டுகளை இழந்து 198 ரன்களை மட்டுமே எடுத்து தோல்வியைத் தழுவியது.
சென்னை அணி தரப்பில் ஆசீப் 2 விக்கெட்டையும், லுங்கி கிடி, ஜடேஜா தலா ஒரு விக்கெட்டையும் வீழ்த்தினர். ஆட்டத்தின் இறுதிக் கட்டத்தில் தனி நபராக விஜய் சங்கர் போராடியும் தில்லியை தோல்வியின் பிடியில் இருந்து மீட்க முடியவில்லை. 
மீண்டும் முதலிடம் பெற்ற சென்னை: புள்ளிகள் பட்டியலில் இரண்டாம் இடத்தில் இருந்த சென்னை அணி, தற்போதைய வெற்றியின் மூலம் மீண்டும் முதலிடத்தை பிடித்தது.

இன்றைய ஆட்டம்
பெங்களூரு-மும்பை 
நேரம்: இரவு 8.00.
இடம்: பெங்களூரு.
நேரடி ஒளிபரப்பு: 
ஸ்டார் ஸ்போர்ட்ஸ்.