'அப்டேட்டில் இருக்கும் ஒரே சாஃப்ட்வேர்'- விராட்டுக்கு வீரு புகழாரம்!

அப்டேட்டில் இருக்கும் ஒரே சாஃப்ட்வேர் விராட் கோலி தான் என அதிரடி வீரர் வீரேந்திர சேவாக் புகழாரம் சூட்டியுள்ளார். 

இந்திய அணியின் முன்னாள் துவக்க வீரரும், உலகின் தலைசிறந்த அதிரடி வீரருமான வீரேந்திர சேவாக், ட்விட்டரில் அதிரடி கருத்துக்களை பதிவிடுவதிலும் கில்லாடி. அவ்வகையில் அந்தந்த நிகழ்வுகளை அடுத்து அவரது ட்வீட்கள் இடம்பெறும். 

இந்நிலையில், இந்திய கேப்டன் விராட் கோலி குறித்து தற்போது சேவாக் செய்த ட்வீட் கிரிக்கெட் ரசிகர்கள் மத்தியில் பெரும் வரவேற்பை பெற்று வருகிறது. அதில், அப்டேட்டில் இருக்கும் ஒரே சாஃப்ட்வேர், ஸ்திரத்தன்மையின் மறுபெயர் விராட் கோலி. 9 ஆயிரம் ரன்களைக் கடந்த 11 இன்னிங்ஸ்களுக்குள்ளாக 10 ஆயிரம் ரன்களையும் தற்போது கடந்துள்ளார். அதுபோதாது என 37-ஆவது சதத்தையும் பதிவு செய்துள்ளார். கிங் கோலியின் ஆட்டத்தை கண்டு மகிழ்ச்சி அடைகிறேன் என்று பதிவிட்டுள்ளார்.

முன்னதாக, மே.இ.தீவுகளுக்கு எதிரான 2-ஆவது ஒருநாள் போட்டியில் இந்திய கேப்டன் விராட் கோலி, சர்வதேச ஒருநாள் போட்டிகளில் 37-ஆவது சதத்தை பதிவு செய்தது மட்டுமல்லாமல், 10 ஆயிரம் ரன்களை வேகமாகக் கடந்த வீரர் எனும் புதிய சாதனையைப் படைத்துள்ளது குறிப்பிடத்தக்கது.