ஆசியப் போட்டியில் விராட் கோலி பங்கேற்காதது ஏன்?: கேள்வி கேட்ட ஸ்டார் ஸ்போர்ட்ஸுக்கு பிசிசிஐ அளித்த பதிலடி!

ஆசிய கோப்பை கிரிக்கெட் போட்டி, ஐக்கிய அரபு நாடுகளின் துபை, அபுதாபி நகரங்களில் தொடங்கியுள்ளது. வரும் 28-ம் தேதி வரை நடைபெறுகிறது. இதில் நடப்பு சாம்பியன் இந்தியா, பாகிஸ்தான், இலங்கை, வங்கதேசம், ஆப்கானிஸ்தான், ஹாங்காங் உள்ளிட்ட 6 நாடுகள் பங்கேற்கின்றன.

இங்கிலாந்தில் டெஸ்ட் மற்றும் ஒரு நாள் போட்டித் தொடர்களை இழந்த நிலையில் இந்தியா இதில் பங்கேற்கிறது. மேலும் அதிரடி பேட்ஸ்மேன், கேப்டன் கோலி இல்லாமல் இந்திய அணி ரோஹித் சர்மா தலைமையில் கலந்து கொள்கிறது. ஆட்டச் சுமை காரணமாக கோலிக்கு ஓய்வு தரப்பட்டுள்ளது. இந்திய நேரப்படி மாலை 5 மணிக்கு ஆட்டங்கள் தொடங்கும். ஸ்டார் ஸ்போர்ட்ஸ் நெட்வொர்க்கில் போட்டிகள் ஒளிபரப்பாகும். இந்திய அணி தனது முதல் ஆட்டத்தை செப்டம்பர் 18 அன்று ஹாங்காங்குக்கு எதிராக விளையாடவுள்ளது. 

இந்நிலையில் விராட் கோலி, ஆசியப் போட்டியில் கலந்துகொள்ளாதது குறித்து ஆசிய கிரிக்கெட் கவுன்சிலுக்கு ஸ்டார் ஸ்போர்ட்ஸ் நிறுவனம் மின்னஞ்சல் அனுப்பியுள்ளது. ஆசியப் போட்டியில் சிறந்த வீரர்கள் கலந்துகொள்வார்கள் என்று ஒப்பந்தத்தில் கூறப்பட்டிருந்தது. ஆனால் விராட் கோலி கலந்துகொள்ளாதது எங்களுக்குப் பாதிப்பை ஏற்படுத்தியுள்ளது. இது, விளம்பர வருவாயைப் பாதிக்கும் என எண்ணுகிறோம் என்று வருத்ததுடன் அனுப்பிய மின்னஞ்சலை பிசிசிஐக்கு அனுப்பியுள்ளது ஆசிய கிரிக்கெட் கவுன்சில். 

ஆனால் ஸ்டார் ஸ்போர்ட்ஸின் இந்தக் கருத்தை பிசிசிஐ ஏற்கவில்லை. பிசிசிஐயின் தலைமைச் செயல் அதிகாரி ராகுல் ஜோஹ்ரி, ஆசிய கிரிக்கெட் கவுன்சில் அதிகாரி துசித் பெரேராவுக்கு அனுப்பிய கடிதத்தில், ஆசியக் கோப்பைக்குச் சிறந்த வீரர்களைக் கொண்ட இந்திய அணியே தேர்வாகியுள்ளது. அணியைத் தேர்வு செய்யும் பொறுப்பு பிசிசிஐ தேர்வுக்குழுவுக்கே உண்டு. எந்த வீரரைத் தேர்வு செய்யவேண்டும் என்பதில் ஆசிய கிரிக்கெட் கவுன்சிலோ தொலைக்காட்சி நிறுவனமோ இதில் தலையிடக்கூடாது என்று பதிலடி அளித்துள்ளது.