கௌன்டி டி20-யில் டி வில்லியர்ஸ் அதிரடி

தென் ஆப்பிரிக்காவின் முன்னாள் கேப்டன் ஏபி டி வில்லியர்ஸ், இங்கிலாந்தில் நடைபெற்று வரும் கௌன்டி டி20 ஆட்டம் ஒன்றில் அரைசதம் விளாசினார்.

முன்னதாக முதல் பேட்டிங் செய்த எஸக்ஸ் அணி 20 ஓவர்களில் 6 விக்கெட்டுகளை இழந்து 164 ரன்கள் சேர்த்து. நெதர்லாந்து வீரர் ரையன் டென் டோஷே ஆட்டமிழக்காமல் 74 ரன்கள் குவித்தார்.

பின்னர் களமிறங்கிய மிடில்செக்ஸ் அணி 39 ரன்களுக்கு 2 விக்கெட்டுகளை இழந்து தடுமாறியது. அப்போது இங்கிலாந்து வீரர் டேவிட் மலான் உடன் ஜோடி சேர்ந்த டி வில்லியர்ஸ், ஆட்டமிழக்காமல் 6 இமாலய சிக்ஸர்கள், 5 பவுண்டரிகள் உட்பட 43 பந்துகளில் 88 ரன்கள் விளாசினார்.

இவர்கள் இருவரும் இணைந்து 3-ஆவது விக்கெட்டுக்கு 105 ரன்கள் சேர்த்தனர். இதனால் அந்த அணி 7 விக்கெட்டுகள் வித்தியாசத்தில் அசத்தல் வெற்றிபெற்றது.

மிடில்செக்ஸ் அணிக்காக முதல் 7 லீக் ஆட்டங்களில் பங்கேற்க ஏபி டி வில்லியர்ஸ் ஒப்பந்தம் செய்யப்பட்டுள்ளார். ஒருவேளை அந்த அணி நாக்-அவுட் சுற்றுகளுக்கு தகுதிபெறும் பட்சத்தில் மீண்டும் அந்த அணிக்காக விளையாடுவார் என்று தெரிவிக்கப்பட்டது.