ஆஸ்திரேலியாவில் நடைபெற்ற டி20 தொடர்களில் தொடர்ந்து நன்றாக விளையாடியுள்ள இந்திய அணி!

இந்தியா - ஆஸ்திரேலியா இடையேயான டி20 கிரிக்கெட் தொடரின் முதல் ஆட்டம் கான்பெராவில் இன்று நடைபெறுகிறது. 

ஒருநாள் தொடரை 1-2 என்ற கணக்கில் ஆஸ்திரேலியாவிடம் இழந்த இந்தியா, டி20 தொடரை கைப்பற்றுமா என்கிற எதிர்பார்ப்பு எழுந்துள்ளது.

ஆஸ்திரேலியாவில் நடைபெற்ற டெஸ்ட், ஒருநாள் தொடர்களை விடவும் டி20 தொடர்களில் இந்திய அணி தொடர்ந்து நன்றாக விளையாடியுள்ளது.

2008-ல் நடைபெற்ற ஆஸ்திரேலியாவுக்கு எதிரான ஒரு ஆட்டம் மட்டும் கொண்ட டி20 தொடரில் இந்திய அணி தோல்வியடைந்தது. அதற்கு முன்பு தான் இந்திய அணி டி20 உலகக் கோப்பையை வென்றிருந்தது.

2011-12: இரு ஆட்டங்கள் கொண்ட டி20 தொடர் 1-1 என சமன் ஆனது. சிட்னியில் நடைபெற்ற முதல் டி20 ஆட்டத்தில் ஆஸ்திரேலியா 31 ரன்களில் வெற்றி பெற அடுத்த டி20 ஆட்டத்தை 8 விக்கெட் வித்தியாசத்தில் வென்றது இந்திய அணி.

2015-16: ஒருநாள் தொடரை 1-5 எனத் தோற்ற பிறகு டி20 தொடரில் ஆஸ்திரேலியாவுக்கு எதிராக 3-0 என முழுமையாக வெற்றி பெற்றது இந்திய அணி. இந்தத் தொடரில் ரோஹித் சர்மா, விராட் கோலி மிகச்சிறப்பாக விளையாடி இந்திய அணியின் வெற்றியைச் சாத்தியமாக்கினார்கள்.

2018-19: இந்தத் தொடர் வழக்கமான ஒன்றில்லை. இந்தமுறை ஆஸ்திரேலியாவில் டெஸ்ட், ஒருநாள் தொடர்களை இந்திய அணி வென்றபோதும் டி20 தொடர் 1-1 என சமன் ஆனது. முதல் ஆட்டத்தை ஆஸ்திரேலியாவும் 3-வது ஆட்டத்தை இந்தியாவும் வென்றன. 2-வது ஒருநாள் ஆட்டத்தில் ஆஸ்திரேலிய அணி 19 ஓவர்களில் 132 ரன்கள் மட்டும் எடுத்திருந்தபோது மழையால் ஆட்டம் வீணானது. இதனால் டி20 தொடரை இந்திய அணியால் வெல்ல முடியாமல் போனது.