வெற்றி விளிம்பில் இந்தியா: உணவு இடைவேளையில் இங்கிலாந்து 116/7

சென்னையில் நடைபெற்று வரும் இந்தியாவுக்கு எதிரான 2-வது டெஸ்டில் இங்கிலாந்து அணி, 4-ம் நாள் உணவு இடைவேளையின்போது 7 விக்கெட் இழப்புக்கு 116 ரன்கள் எடுத்துத் தடுமாறி வருகிறது.

இங்கிலாந்து கிரிக்கெட் அணி, இந்தியாவில் சுற்றுப்பயணம் செய்து இந்திய அணிக்கு எதிராக 4 ஆட்டங்கள் கொண்ட டெஸ்ட் தொடரில் விளையாடி வருகிறது. இதில் சென்னையில் நடைபெற்ற முதல் டெஸ்டில் இங்கிலாந்து அணி 227 ரன்கள் வித்தியாசத்தில் இந்திய அணியை வீழ்த்தியது.

சென்னையில் தொடங்கிய 2-வது டெஸ்டில் டாஸ் வென்ற இந்திய கேப்டன் விராட் கோலி, பேட்டிங்கைத் தேர்வு செய்தார். இந்திய அணியிலிருந்து வாஷிங்டன் சுந்தர் நீக்கம் செய்யப்பட்டார். பும்ராவுக்கு ஓய்வளிக்கப்பட்டுள்ளது. குல்தீப் யாதவ் இந்திய அணிக்கு மீண்டும் திரும்பியுள்ளார். அக்‌ஷர் படேல் டெஸ்ட் கிரிக்கெட்டுக்கு அறிமுகம் ஆகியுள்ளார். இந்த டெஸ்டுக்கு 50% ரசிகர்கள் அனுமதிக்கப்பட்டுள்ளார்கள். 

இந்தியா முதல் இன்னிங்ஸில் 329 ரன்கள் எடுத்தது. இதன்பிறகு விளையாடிய இங்கிலாந்து அணி, 59.5 ஓவர்களில் 134 ரன்களுக்குச் சுருண்டது. இந்திய அணி 2-வது இன்னிங்ஸில் அஸ்வின் சதத்துடன் 286 ரன்கள் எடுத்தது. இதையடுத்து இங்கிலாந்து அணிக்கு 482 ரன்கள் இலக்கு நிர்ணயிக்கப்பட்டது. 3-ம் நாள் முடிவில் இங்கிலாந்து அணி 19 ஓவர்களில் 3 விக்கெட் இழப்புக்கு 53 ரன்கள் எடுத்தது. இங்கிலாந்து அணிக்கு 7 விக்கெட்டுகள் மீதமுள்ள நிலையில் 429 ரன்கள் பின்தங்கியிருந்தது. 

இன்று ஆட்டம் தொடங்கிய சில நிமிடங்களில் லாரன்ஸை 26 ரன்களில் வீழ்த்தினார் அஸ்வின். ரிஷப் பந்த் அற்புதமாக ஸ்டம்பிங் செய்து அவரை வெளியேற்றினார். அடுத்து, பென் ஸ்டோக்ஸை மீண்டுமொரு முறை வீழ்த்தினார் அஸ்வின். 8  ரன்கள் மட்டுமே அவர் எடுத்தார். போப், 12 ரன்களில் அக்‌ஷர் படேல் பந்துவீச்சிலும் பென் ஃபோக்ஸ் 2 ரன்களில் குல்தீப் யாதவ் பந்துவீச்சிலும் ஆட்டமிழந்தார்கள். 

4-ம் நாள் உணவு இடைவேளையின்போது இங்கிலாந்து அணி, 48.3 ஓவர்களில் 7 விக்கெட் இழப்புக்கு 116 ரன்கள் எடுத்துத் தடுமாறி வருகிறது. இங்கிலாந்து அணி 3 விக்கெட்டுகள் மீதமுள்ள நிலையில் 366 ரன்கள் பின்தங்கியுள்ளதால் இந்திய அணி அடுத்த பகுதியில் வெற்றியை எட்டி விடும் என எதிர்பார்க்கப்படுகிறது.