கடைசி டி20: ஆஸ்திரேலியா 186 ரன்கள் குவிப்பு

இந்தியாவுக்கு எதிரான கடைசி டி20 ஆட்டத்தில் அதிரடியாக ஆடிய ஆஸ்திரேலியா 20 ஓவர்களில் 7 விக்கெட்டுகள் இழப்புக்கு 186 ரன்கள் குவித்தது.

இந்தியா - ஆஸ்திரேலியா மோதும் டி20 தொடரின் 3-ஆவது மற்றும் இறுதி ஆட்டம் ஐதராபாத்தில் உள்ள ராஜீவ் காந்தி சர்வதேச கிரிக்கெட் மைதானத்தில் இன்று நடைபெறுகிறது. டாஸ் வென்ற இந்திய அணியின் கேப்டன் ரோஹித் சர்மா பந்துவீச்சைத் தேர்வு செய்தார். ஆஸ்திரேலிய அணியின் தொடக்க ஆட்டக்காரர்களாக கேமரூன் கிரீன், ஆரோன் பிஞ்ச் ஆகியோர் களமிறங்கினர். 

பிஞ்ச் 7 ரன்களில் வெளியேற அடுத்த வந்த ஸ்டீவன் சுமித் 9, மேக்ஸ்வெல் 6  ஆகியோரும் ஒற்றை இலக்க ரன்களில் ஆட்டமிழந்தனர்.

அதிரடியாக விளையாடிய கேமரூன் கிரீன் 21 பந்துகளில் 52 ரன்களுக்கு தனது விக்கெட்டை பறிகொடுத்தார். ஜோஷ் இங்லிஸ் தன் பங்கிற்கு 24 ரன்கள் எடுத்து பெவிலியன் திரும்பினார். கடைசி கட்டத்தில் களமிறங்கிய டேனியல் சாம்ஸ், டிம் டேவிட் ஜோடி இந்திய அணியின் பந்துவீச்சை சிதறடித்தனர். 

இதையும் படிக்க- தமிழ்நாடு முழுவதும் பாட்டில், கேன்களில் பெட்ரோல், டீசல் விற்பனை தடை!

எனினும் டிம் டேவிட் 27 பந்துகளில் 54 ரன்கள் எடுத்திருந்தபோது ஆட்டமிழந்தார். நிர்ணயிக்கப்பட்ட 20 ஓவர்களில் 7 விக்கெட்டுகள் இழப்புக்கு 186 ரன்கள் குவித்தது. டேனியல் சாம்ஸ் 28 ரன்களுடன் ஆட்டமிழக்காமல் இருந்தார். இந்திய தரப்பில் சிறப்பாக பந்துவீசிய அக்சர் படேல் 3 விக்கெட்டுகளை கைப்பற்றினார்.