'விராட் கோலி ஃபார்மில் இருந்தாலும், இல்லாவிட்டாலும்..’ என்ன சொல்கிறார் ராகுல் டிராவிட்

ஆட்டத்தின் போக்கை சிறப்பாக புரிந்து கொள்ளும் திறன் கொண்ட விராட் கோலிக்கு எப்போது அதிரடியாக விளையாட வேண்டும், எப்போது நிதானமாக விளையாட வேண்டும் என்பது தெரியும் என ராகுல் டிராவிட் தெரிவித்துள்ளார்.

இந்திய அணியின் முன்னாள் கேப்டன் விராட் கோலி ஆசியக் கோப்பைத் தொடரின்போது மீண்டும் ஃபார்முக்குத் திரும்பினார். அதன்பின், அவர் ஆஸ்திரேலியாவில் நடைபெற்ற டி20 உலகக் கோப்பையில் சிறப்பான ஆட்டத்தை வெளிப்படுத்தினார். கடந்த வாரம், ஒரு நாள் போட்டியில் தனது 44வது சதத்தை அவர் பூர்த்தி செய்தார். 

இதையும் படிக்க: அறிமுக ரஞ்சி ஆட்டத்தில் பெரிய சதமடித்த சாய் சுதர்சன்

இந்த நிலையில், இந்திய அணியின் தலைமைப் பயிற்சியாளர் ராகுல் டிராவிட் விராட் கோலிக்கு எப்போது அதிரடியாக விளையாட வேண்டும், எப்போது நிதானமாக விளையாட வேண்டும் என்பது தெரியும் எனத் தெரிவித்துள்ளது முக்கியத்துவம் பெறுகிறது.

இது குறித்து பிசிசிஐ வெளியிட்டுள்ள விடியோவில் அவர் கூறியிருப்பதாவது: விராட் கோலிக்கு எப்போது ஆக்ரோஷமாக விளையாட வேண்டும், எப்போது ஆட்டத்தில் நிதானம் காட்ட வேண்டும் என்பது நன்றாகத் தெரியும். அவர் களத்தில் நின்று ரன்களை சேர்த்து விளையாடுவது அணிக்கு பலம். 50 ஓவர் போட்டிகளில் அவர் ஒரு மிகச் சிறந்த ஆட்டக்காரர். அவரது சாதனைகளே அதற்கு சான்றாகும். அவரது சிறப்பான ஆட்டத்தினை பல தருணங்களில் வெளிப்படுத்தியுள்ளார். அவர் ஃபார்மில் இருந்தாலும், இல்லாவிட்டாலும் அவரது கிரிக்கெட் வலைப்பயிற்சியின் தீவிரம் மட்டும் குறையவில்லை. அவர் ஒவ்வொரு முறை பயிற்சியில் ஈடுபடும் போதும் அவர் மீண்டும் பழைய ஃபார்முக்குத் திரும்புவதைப் பார்க்கிறேன். அவர் அணியில் உள்ள இளம் வீரர்களுக்கு ஊக்கமளிப்பவராக உள்ளார் என்றார்.