தமிழகத்துக்கு எதிரான ரஞ்சி கோப்பை ஆட்டத்தில் ஆந்திர அணி 5 விக்கெட்டுகள் மீதமுள்ள நிலையில் 114 ரன்கள் முன்னிலை பெற்றுள்ளது.
2022-23 ரஞ்சி கோப்பை போட்டியில் ஹைதராபாத் அணிக்கு எதிரான முதல் ஆட்டத்தை டிரா செய்த தமிழக அணி, 3 புள்ளிகளைப் பெற்றது. 2-வது ஆட்டத்தில் ஆந்திராவை எதிர்கொள்கிறது.
தமிழ்நாடு - ஆந்திரா அணிகளுக்கு இடையிலான ரஞ்சி ஆட்டம் கோயம்புத்தூர் எஸ்என்ஆர் கல்லூரி மைதானத்தில் நடைபெற்று வருகிறது. டாஸ் வென்ற ஆந்திர அணி பேட்டிங்கைத் தேர்வு செய்தது. தமிழக அணியில் வாஷிங்டன் சுந்தர் இடம்பெற்றுள்ளார்.
32 வருடங்கள் கழித்து கோயம்புத்தூரில் ரஞ்சி கோப்பை ஆட்டம் நடைபெறுகிறது. கடந்த வருடம் சென்னை சேப்பாக்கம் மைதானத்தில் இங்கிலாந்துக்கு எதிரான இரு டெஸ்டுகள் நடைபெற்றபோது ஆடுகள வடிவமைப்பாளராக இருந்த ரமேஷ் குமார், இந்த மைதானத்தின் ஆடுகள வடிவமைப்பாளராகச் செயல்படுகிறார்.
ஆந்திர அணி முதல் இன்னிங்ஸில் 100.1 ஓவர்களில் 297 ரன்களுக்கு அனைத்து விக்கெட்டுகளையும் இழந்தது. தொடக்க வீரர் அபிஷேக் ரெட்டி அதிகபட்சமாக 85 ரன்கள் எடுத்தார். சாய் கிஷோர், சந்தீப் வாரியர் தலா 3 விக்கெட்டுகளை வீழ்த்தினார்கள்.
2-வது நாள் முடிவில் தமிழக அணி, 77 ஓவர்களில் 4 விக்கெட் இழப்புக்கு 273 ரன்கள் எடுத்தது. தொடக்க வீரர் சாய் சுதர்சன் 113, பாபா அபரஜித் 88 ரன்கள் எடுத்தார்கள். வாஷிங்டன் சுந்தர் 7 ரன்களுடனும் விஜய் சங்கர் ரன் எதுவும் எடுக்காமலும் ஆட்டமிழக்காமல் இருந்தார்கள்.
இந்நிலையில் தமிழக அணி முதல் இன்னிங்ஸில் 112.1 ஓவர்களில் 345 ரன்கள் எடுத்து ஆட்டமிழந்தது. ஆந்திராவின் நிதிஷ் குமார் 4 விக்கெட்டுகளை வீழ்த்தினார். முதல் இன்னிங்ஸில் தமிழக 48 ரன்கள் முன்னிலை பெற்றது.
3-வது நாள் முடிவில் ஆந்திர அணி 53 ஓவர்களில் 5 விக்கெட்டுகள் இழப்புக்கு 162 ரன்கள் எடுத்துள்ளது. ரிக்கி புய் ஆட்டமிழக்காமல் 62 ரன்கள் எடுத்துள்ளார். ஆந்திர அணி 5 விக்கெட்டுகள் மீதமுள்ள நிலையில் 114 ரன்கள் முன்னிலை பெற்றுள்ளது. இதனால் 4-வது நாள் ஆட்டம் பரபரப்பாக அமையும் என எதிர்பார்க்கப்படுகிறது.