மெஸ்ஸியைச் சந்தித்த அமிதாப் பச்சன் (விடியோ)

ரியாத் நகரில் நடைபெற்ற கண்காட்சி கால்பந்து ஆட்டத்தில் பிரபல வீரர்களான மெஸ்ஸி, ரொனால்டோவைச் சந்தித்தது குறித்த காணொளியை வெளியிட்டுள்ளார் பிரபல நடிகர் அமிதாப் பச்சன்.

பாரிஸ் செயின் ஜெர்மன் (பி.எஸ்.ஜி.) -  ரியாத் சீசன் (அல் நசார் லெவன்) அணிகளுக்கு இடையிலான கண்காட்சி ஆட்டம் சவுதி அரேபியா தலைநகர் ரியாத் நகரில் நடைபெற்றது. பிஎஸ்ஜி அணியில் மெஸ்ஸி, நெய்மர், எம்பாப்பே இடம்பெற்றார்கள். ரியாத் சீசன் அணிக்கு ரொனால்டோ தலைமை தாங்கினார். இந்த ஆட்டத்தில் மெஸ்ஸி அணி 5-4 என வென்றது. 

மெஸ்ஸி, ரொனால்டோ ஆகிய இருவரும் கோல் அடித்து ரசிகர்களை உற்சாகப்படுத்தினார்கள். மெஸ்ஸி ஒரு கோலும் ரொனால்டோ இரு கோல்களும் அடித்தார்கள். இருவரும் ஒரு மணி நேரம் களத்தில் விளையாடினார்கள். 

இந்நிலையில் இந்த ஆட்டத்தின் சிறப்பு விருந்தினராகக் கலந்துகொண்ட பிரபல நடிகர் அமிதாப் பச்சன், ஆட்டம் தொடங்கும் முன்பு மெஸ்ஸி, ரொனால்டோ ஆகிய வீரர்களைச் சந்தித்து வாழ்த்து தெரிவித்தார். இதன் காணொளியைத் தன் ட்விட்டர் பக்கத்தில் அமிதாப் பச்சன் வெளியிட்டுள்ளார். 

வரும் ஞாயிறன்று சவுதி ப்ரோ லீக் போட்டியில் அல் நசார் அணிக்காக அறிமுகம் ஆகவுள்ளார் ரொனால்டோ. ஐரோப்பிய கிளப் கால்பந்தை விட்டுவிட்டு சவுதி அரேபிய கிளப் அணியில் ரொனால்டோ இணைந்துள்ளதால் மெஸ்ஸி - ரொனால்டோ இருவரும் கடைசியாக மோதிய ஆட்டம் இதுதான் என்று கூறப்படுகிறது. இதற்கு முன்பு இருவரும் 2020-ல் சாம்பியன்ஸ் லீக் போட்டியில் சந்தித்தார்கள்.