உலகக் கோப்பைத் தொடரில் இறுதிப்போட்டிக்கு முன்பு வரை தோல்வியே காணாமல் ஆதிக்கம் செலுத்தி இறுதிப்போட்டியில் மட்டும் தோல்வியடைந்த அணிகளின் வரிசையில் இந்தியாவும் இணைந்துள்ளது.
உலகக் கோப்பை இறுதிப்போட்டியில் ஆஸ்திரேலிய அணி இந்தியாவை 6 விக்கெட்டுகள் வித்தியாசத்தில் வீழ்த்தி 6-வது முறையாக கோப்பையை கைப்பற்றி அசத்தியது. உலகக் கோப்பைத் தொடரின் தொடக்கம் ஆஸ்திரேலிய அணிக்கு சிறப்பானதாக அமையவில்லை. இருப்பினும், சில போட்டிகளுக்குப் பிறகு அவர்கள் தங்களது சிறப்பான ஆட்டத்தை வெளிப்படுத்தி 6-வது முறையாக கோப்பையையும் கைப்பற்றியுள்ளனர்.
அதேவேளையில், உலகக் கோப்பைத் தொடரில் லீக் போட்டி முதல் அரையிறுதி வரை தோல்வியே காணாமல் ஆதிக்கம் செலுத்திய இந்திய அணி இறுதிப்போட்டியில் தோல்வியைத் தழுவி இந்திய ரசிகர்களுக்கு அதிர்ச்சியையும், ஏமாற்றத்தையும் அளித்தது.
தொடர்ச்சியாக 10 போட்டிகளில் வெற்றி பெற்று நடப்பு உலகக் கோப்பையில் ஆதிக்கம் செலுத்திய இந்திய அணி இறுதிப்போட்டியில் ஆஸ்திரேலியாவிடம் அதிர்ச்சித் தோல்வியடைந்தது.
ஓர் உலகக் கோப்பைத் தொடரில் இறுதிப்போட்டியில் மட்டும் தோல்வியடைந்த அணிகள்
இந்தியா - 10 வெற்றிகள், இறுதிப்போட்டியில் தோல்வி (2023)
நியூசிலாந்து - 8 வெற்றிகள், இறுதிப்போட்டியில் தோல்வி (2015)
இங்கிலாந்து - 4 வெற்றிகள், இறுதிப்போட்டியில் தோல்வி (1979)