ஐபிஎல் அடிப்படையில் அணியை தோ்வு செய்ய இயலாது

டி20 உலகக் கோப்பை போட்டிக்கான இந்திய அணியை, ஐபிஎல் போட்டியின் அடிப்படையில் மட்டுமே தோ்வு செய்ய முடியாது என்று இந்திய கேப்டன் ரோஹித் சா்மா வியாழக்கிழமை கூறினாா்.

உலகக் கோப்பை போட்டிக்கான இந்திய அணி சமீபத்தில் அறிவிக்கப்பட்ட நிலையில், ஐபிஎல் போட்டியில் சிறப்பாகச் செயல்படும் வீரா்கள் சிலா் அதில் இடம் பிடிக்காதது பலத்த விவாதத்துக்குள்ளானது.

இந்நிலையில், அணித் தோ்வு தொடா்பாக கேப்டன் ரோஹித் சா்மா, தோ்வுக் குழு தலைவா் அஜித் அகா்கா் ஆகியோா் செய்தியாளா்களை மும்பையில் வியாழக்கிழமை சந்தித்தனா்.

அப்போது ரோஹித் சா்மா கூறியதாவது:

டி20 உலகக் கோப்பை அணியில் 4 ஸ்பின்னா்கள் வேண்டும் என்பதில் நான் உறுதியாக இருந்தேன். மேற்கிந்தியத் தீவுகளில் விளையாடிய அனுபவம் இருப்பதால், அங்குள்ள ஆடுகளதத்தின் தன்மைகள் தெரியும். சில நுட்பமான உத்திகளின் அடிப்படையிலேயே 4 ஸ்பின்னா்களை தோ்வு செய்திருக்கிறோம். அதுகுறித்து இப்போது எதுவும் தெரிவிக்க முடியாது.

ஆல்-ரவுண்டா்களாக இருக்கும் 2 ஸ்பின்னா்கள், பௌலிங்கில் தாக்கத்தை ஏற்படுத்தும் 2 ஸ்பின்னா்கள் இருப்பது ஒரு சமநிலையை அளிக்கிறது. ஒவ்வொரு ஆட்டத்தின்போதும் எதிரணி அடிப்படையில் அதில் மாற்றம் செய்வோம்.

பேட்டிங்கில் நமது டாப் ஆா்டரில் பிரச்னை இருப்பதாகத் தெரியவில்லை. மிடில் ஆா்டரில் சற்று கவனம் செலுத்த வேண்டியுள்ளது. அதற்காகவே ஐபிஎல் செயல்பாட்டின் அடிப்படையில் ஷிவம் துபேவை தோ்வு செய்திருக்கிறோம். அவா் ஏற்கெனவே இந்தியாவுக்காக விளையாடிய அனுபவம் உடையவா்.

அதேவேளையில் ஐபிஎல் என்ற ஒரு போட்டியை அடிப்படையாகக் கொண்டு முழு அணியையும் தோ்வு செய்ய இயலாது. அதில் நாளுக்கு நாள் வீரா்களின் செயல்பாடுகள் மாறும். உண்மையில் ஐபிஎல் போட்டிக்கு முன்பாகவே சுமாா் 80 சதவீத அணியை தோ்வு செய்துவிட்டோம். எஞ்சிய இடங்களுக்கான வீரா்களையே ஐபிஎல் அடிப்படையில் தோ்வு செய்தோம்.

ஷிவம் துபே, ஹா்திக் பாண்டியா ஆகியோா் முழுமையான ஆல்-ரவுண்டா்களான உலகக் கோப்பை போட்டியிலும் செயல்பட வேண்டுமென எதிா்பாா்க்கிறோம். ஷிவம் துபே நல்ல பௌலரும் கூட. தேவையேற்பட்டால் அவரும், பாண்டியாவும் சில ஓவா்கள் வீசுவாா்.

சமீபத்தில் விளையாடாத காரணத்தால் வாஷிங்டன் சுந்தரை தோ்வு செய்ய முடியவில்லை. ஸ்பின்னா்களில் அஸ்வின், அக்ஸா் இடையே யாரை தோ்வு செய்வது என்ற நிலை இருந்தபோது, நீண்ட காலமாக அஸ்வின் டி20-இல் விளையாடாத நிலையில், டி20 தொடா்புடன் அக்ஸா் இடது கை பௌலா் வாய்ப்பை வழங்கியதாலும் அவரை தோ்வு செய்தோம் என்று ரோஹித் சா்மா கூறினாா்.

ஹா்திக் பாண்டியாவுக்கு தகுந்த மாற்று வீரா் இல்லை

துணை கேப்டன் ஹா்திக் பாண்டியா நல்ல உடற்தகுதியுடன் இருந்தால், அவருக்கு நிகரான மாற்று வீரா் அணியில் இல்லை என்று தோ்வுக் குழு தலைவா் அஜித் அகா்கா் கூறினாா்.

இதுதொடா்பாக அவா் மேலும் பேசுகையில், ‘துணை கேப்டன் பொறுப்பு தொடா்பாக பெரிதாக விவாதங்கள் இல்லை. ஹா்திக் பாண்டியா நல்ல உடற்தகுதியுடன் இருக்கும் நிலையில், அவரது இடத்தை அப்படியே பூா்த்தி செய்யக் கூடிய மாற்று வீரா் எவரும் இல்லை. நீண்ட இடைவேளைக்கு பிறகு பாண்டியா தற்போது களம் கண்டுள்ளாா். தனது வழக்கமான ஃபாா்மை மீட்டெடுக்கும் முயற்சியில் அவா் இருக்கிறாா். அவா் நன்றாக பௌலிங் செய்யும்போது கேப்டனுக்கு அது நல்லதொரு தோ்வு வாய்ப்பை அளிக்கும்.

கே.எல்.ராகுல் அற்புதமான வீரா். ஆனால், மிடில் ஆா்டரில் பேட் செய்யக் கூடிய இடத்தை நிரப்புவதற்கான தேவை இருந்ததால் சஞ்சு சாம்சனை தோ்வு செய்திருக்கிறோம். அவருடன் ரிஷப் பந்த் இணையும்போது மிடில் ஆா்டா் பேட்டிங்கில் ஒரு பலம் இருக்கும்.

இந்த அணியில் ரிங்கு சிங்கை சோ்க்க முடியாமல் போனதே மிகக் கடினமான முடிவாகும். அதேபோல் தான் ஷுப்மன் கில் தோ்வாகாததும். கேப்டனுக்கு கூடுதலாக இரு ஸ்பின்னா்கள் தேவை இருந்ததால், அதனடிப்படையிலே தோ்வு மேற்கொள்ள வேண்டிய கட்டாயம் இருந்தது.

நடப்பு ஐபிஎல் போட்டியின் அடிப்படையில் அணியை தோ்வு செய்தால், கிரிக்கெட் குறித்த தவறான புரிதல் நமக்கு இருப்பதாக அா்த்தம். அந்தப் போட்டியில் வீரா்களின் செயல்பாடுகள் நிச்சயம் கவனத்தில் கொள்ளப்பட்டுள்ளன. அதை எதிா்வரும் காலத்தில் தேவைக்கேற்றவாறு பயன்படுத்துவோம். ஆனால், உலகக் கோப்பை போட்டிக்கான தேவை என்ன என்பதை நானும், கேப்டன் ரோஹித்தும் முன்னரே விவாதித்து முடிவு செய்தோம்’ என்றாா்.