பத்திரிகையாளர் சி.ஆர். கண்ணன் காலமானார்

சென்னை, ஜூலை 9: முதுபெரும் பத்திரிகையாளர் சி.ஆர். கண்ணன் (79) சென்னையில் வியாழக்கிழமை காலமானார்.

 கடலூர் மாவட்டம், மஞ்சக்குப்பத்தில் பிறந்தவர் கண்ணன். முறையாக நடனம் பயின்று, திரைப்படத் துறையின் மூலம் கலையுலக வாழ்க்கையைத் தொடங்கிய அவர், தினமணி கதிரில் உதவி ஆசிரியராகச் சேர்ந்து பத்திரிகையாளராக மாறியவர்.

 பத்திரிகையாளர் சாவியால் அவருக்கு சூட்டப்பட்ட புனைபெயர் "அபர்ணா நாயுடு'. அப்பெயரில் அவர் எழுதிய பல சிறுகதைகள் மற்றும் தொடர் கதைகள் தினமணி கதிர், கல்கி, சாவி, குங்குமம் மற்றும் பல முன்னணி பத்திரிகைகளில் வெளியாகியுள்ளன.

 "சகுந்த்' என்கிற புனைபெயரில் ஓவியர் ஜெயராஜும், சி.ஆர். கண்ணனும் இணைந்து வாராவாரம் தொடர்ந்து எழுதிய ஒரு பக்கக் கதைகள், தினமணி கதிரின் சிறப்பு அம்சமாகப் பேசப்பட்டது.

 அவரது கதையான "பகடை பன்னிரண்டு' திரைப்படமாகியுள்ளது. கமலஹாசன் உள்ளிட்ட முன்னணிக் கலைஞர்கள் அதில் நடித்துள்ளனர்.

 சி.ஆர். கண்ணன் ஒரு சிறந்த மொழி பெயர்ப்பாளரும்கூட. "தற்கால ஜெர்மானிய சிறுகதைகள்' என்ற தொகுப்பிலுள்ள கதைகள் அவராலேயே மொழிபெயர்க்கப்பட்டவை.

 சிறிது காலம் உடல் நலமின்றி இருந்த கண்ணன், சென்னை பெசன்ட் நகரிலுள்ள அவரது வீட்டில் வியாழக்கிழமை காலை உயிரிழந்தார். அவருக்கு ஒரு மகன், ஒரு மகள் உள்ளனர்.

 அவரது இல்ல தொலைபேசி: 044-24912660.