நெல்லையில் மின்வாரிய தொழிலாளர்கள் போராட்டம்:438 பேர் கைது

பாளையங்கோட்டையில் சாலை மறியல் போராட்டத்துக்கு முயன்ற மின்வாரிய தொழிலாளர்கள் 438 பேரை போலீஸார் புதன்கிழமை கைது செய்தனர்.

தமிழ்நாடு மின்சார வாரியத்தில் காலியாக உள்ள பணியிடங்களை ஒப்பந்தத் தொழிலாளர்களைக் கொண்டு நிரப்ப வேண்டும். அனைத்து ஒப்பந்தத் தொழிலாளர்களையும் அடையாளம் கண்டு தினக்கூலியாக ரூ.250 மற்றும் நிகழாண்டுக்கான போனஸ், கருணைத் தொகை வழங்க வேண்டும். ஒப்பந்தத் தொழிலாளர்களைக் கொண்டு மின்வாரியப் பணிகளை முடித்துவிட்டு அதன்பின்பு ஒப்பந்த தொழிலாளர்களே இல்லை என்று அறிக்கை அளிப்பதைக் கைவிட வேண்டும் என்பன உள்ளிட்ட பல்வேறு கோரிக்கைகளை வலியுறுத்தி புதன்கிழமை சாலைமறியல் போராட்டம் நடைபெறும் என அறிவிக்கப்பட்டிருந்தது.

தமிழ்நாடு மின்ஊழியர் மத்திய அமைப்பு (சி.ஐ.டி.யூ.), தமிழ்நாடு மின்சார வாரிய ஒப்பந்தத் தொழிலாளர் சங்கம் உள்ளிட்ட சங்கங்கள் போராட்டத்துக்கு ஆதரவு தெரிவித்திருந்தன. அதன்படி பாளையங்கோட்டை தியாகராஜநகரில் உள்ள மின்வாரிய அலுவலகம் முன்பு பல்வேறு சங்கத்தினரும் திரண்டனர். போராட்டத்துக்கு எஸ்.பூலுடையார் தலைமை வகித்தார். சி.ஐ.டி.யூ. மாநில துணைப் பொதுச்செயலர் ஆர்.கருமலையான் தொடக்கவுரையாற்றினார்.

மார்க்சிஸ்ட் கம்யூனிஸ்ட் கட்சியின் மாவட்டச் செயலர் கே.ஜி.பாஸ்கரன் உள்ளிட்டோர் பங்கேற்றனர்.
மகாராஜநகர்-சிவந்திப்பட்டி சாலையில் மறியலுக்கு முயன்றதாக 438 பேரை, அங்கு பாதுகாப்புக்காக நின்று கொண்டிருந்த காவல் உதவி ஆணையர் கந்தசாமி தலைமையிலான போலீஸார் கைது செய்து தனியார் திருமண மண்டபத்தில் அடைத்தனர்.