வேதாரண்யத்தில் கரை ஒதுங்கிய ஆளில்லா இலங்கைப் படகு

நாகை மாவட்டம், வேதாரண்யத்தில் ஆளில்லா கண்ணாடியிழைப் படகு ஒன்று கரை ஒதுங்கியது திங்கள்கிழமை காலை தெரியவந்தது. இந்தப் படகு இலங்கையைச் சேர்ந்ததாக இருக்கலாம் என போலீஸார் கருதுகின்றனர்.
 வேதாரண்யம், மணியன்தீவு கடற்கரையில் கரை ஒதுங்கிய இந்தப் படகில் 8 குதிரைத் திறனுடைய யமஹா என்ஜின் பொருத்தப்பட்டிருந்தது. பச்சை வண்ணத்தில் இருந்த படகின் பக்கவாட்டின் மையப் பகுதியில் காவி வண்ணத்தில் தடித்த கோடு காணப்பட்டது. பதிவு எண் போன்ற விவரங்கள் இல்லை.
 இதில், மீன்பிடி வலைகள் நான்கு கட்டுகள் இருந்தன. படகில் கிடந்த குடிநீர் பாட்டிலில் இலங்கையைச் சேர்ந்த நிறுவனத்தின் பெயர் இருந்தது. இதனால் படகும் அந்த நாட்டைச் சேர்ந்ததாக இருக்கலாம் என போலீஸார் கருதுகின்றனர்.
 படகை கைப்பற்றிய வேதாரண்யம் கடலோரக் காவல் நிலைய போலீஸார் இதுதொடர்பாக வழக்குப் பதிவு செய்துள்ளனர். மேலும், கியூ பிரிவு உள்ளிட்ட பல்வேறு பிரிவு போலீஸாரும் விசாரணை நடத்தி வருகின்றனர்.