நெல்லை மாவட்டத்தில் இடியுடன் பலத்த மழை

திருநெல்வேலி மாவட்டத்தில் சனிக்கிழமை பல்வேறு இடங்களில் இடியுடன்கூடிய பலத்த மழை பெய்தது. இதனால், வெப்பம் தணிந்து குளிர்ந்த காற்று வீசியதால் மக்கள் மகிழ்ச்சி அடைந்தனர்.

திருநெல்வேலி மாவட்டத்தில் கடந்த சில தினங்களாக கடும் வெப்பம் நிலவி வருகிறது. இந்த நிலையில், சனிக்கிழமை அம்பாசமுத்திரம், கல்லிடைக்குறிச்சி பகுதிகளில் பிற்பகலில் 2 மணி நேரம் இடியுடன்கூடிய பலத்த மழை பெய்தது. இதனால், சாலைகளில் மழைநீர் பெருக்கெடுத்து ஓடியது.

தொடர்ந்து பெய்த மழையால் மின்தடை ஏற்பட்டது.

இதேபோல, விக்கிரமசிங்கபுரம், சேரன்மகாதேவி, முக்கூடல், மேலச்செவல், முன்னீர்பள்ளம் உள்பட மாவட்டத்தில் பல்வேறு பகுதியில் பரவலாக மழை பெய்தது.

திருநெல்வேலி சந்திப்பு, வண்ணார்பேட்டை, மேலப்பாளையம், பாளையங்கோட்டை பகுதியில் மாலையில் பெய்த மழையால் வெப்பம் குறைந்து குளிர்ந்த காற்று வீசியது. பல இடங்களில் மின்தடையும் ஏற்பட்டது.

சனிக்கிழமை காலை நிலவரப்படி அதிகபட்சமாக ஆலங்குளத்தில் 18.4 மி.மீ., சங்கரன்கோவிலில் 15 மி.மீ. மழை., நம்பியாறு அணையில் 51 மி.மீ. மழை பதிவானது.

பாபநாசம் அணையின் நீர்மட்டம் 57.65 அடி, சேர்வலாறு அணை 67.98 அடி, மணிமுத்தாறு அணை 56.37 அடியாக இருந்தது.