விவசாய சங்கங்களின் வேலை நிறுத்தப் போராட்டத்துக்கு வணிகர் சங்கம் ஆதரவு

விவசாய சங்கங்கள் சார்பில் செப்.29-ம் தேதி நடைபெறவுள்ள வேலை நிறுத்தப் போராட்டத்துக்கு வணிகர் சங்கங்களின் பேரவை ஆதரவு அளிக்கும் என்றார் வணிகர் சங்கங்களின் பேரவை மாநிலத் தலைவர் த. வெள்ளையன்.

திருவாரூரில் இன்று செய்தியாளர்களிடம் அவர் கூறியது:

காவிரியில் தமிழக உரிமையில் கர்நாடகம் நியாயமாக நடந்து கொள்ளமால் தேசிய ஒருமைப்பாட்டுக்கு எதிராகவே நடந்து கொள்கிறது. கர்நாடகத்தின் இச்செயலை மத்தியில் ஆட்சிக்கு வரும் எந்தக் கட்சியும் நடவடிக்கை மேற்கொள்வதில்லை.

கர்நாடகம் தமிழகத்துக்கு தண்ணீர் கொடுக்காததைக் கண்டித்து தமிழகத்தில் செப்.29-ம் தேதி விவசாய சங்கங்கள் மற்றும் மக்கள் நலன் காக்கும் கூட்டியக்கம் சார்பில் சாலை மறியல், ஆர்ப்பாட்டம் நடத்துக்கிறது. இதற்கு வணிகர் சங்கங்களின் பேரவை ஆதரவு அளிக்கும். ஆனால் கடைகளை அடைக்கக்கோரி கட்டாயப்படுத்தக் கூடாது.

அனைத்துத் தொழில்களிலும் அந்நிய ஆதிக்கம் இருப்பதுக்கு காரணம் உலக வர்த்தக ஒப்பந்தம்மே. 2016 சட்டப் பேரவைத் தேர்தலில் உலக வர்த்தக ஒப்பந்தத்துக்கு எதிர்ப்புத் தெரிவிக்கும் கட்சிக்கு ஆதரவு அளிக்கப்படும். அவ்வாறு எந்த அரசியல் கட்சியும் கருத்து தெரிவிக்கவில்லையெனில் மக்களிடத்தில் தேர்தலை புறக்கணிக்க பிரசாரம் மேற்கொள்ளப்படும். தமிழகத்தில் நடந்து முடிந்த உலக முதலீட்டாளர்கள் மாநாடு மக்களுக்கு எவ்வித பயனும் அளிக்காது என்றார் வெள்ளையன்.