பத்தமடை, கல்லிடைக்குறிச்சியில் பக்ரீத் சிறப்பு தொழுகை

திருநெல்வேலி: பத்தமடை, கல்லிடைக்குறிச்சியில் செவ்வாய்க்கிழமை பக்ரீத் பண்டிகையை முன்னிட்டு சிறப்புத் தொழுகை நடைபெற்றது.

சேரன்மகாதேவி - திருநெல்வேலி பிரதானச் சாலையில் பத்தமடையில் அமைந்துள்ள ஈத்கா மைதானத்தில் நடைபெற்ற சிறப்புத் தொழுகையில் பத்தமடை, கேசவசமுத்திரம் பகுதியிலுள்ள இஸ்லாமியர்கள் கலந்து கொண்டனர்.

கல்லிடைக்குறிச்சி கீழ தைக்கால் தெரு ரஹ்மத் ஜூம்ஆ மஸ்ஜித் ஈத்கா மைதானத்தில் நடைபெற்ற சிறப்புத் தொழுகையினை இமாம் ஜெ. ராஜாமுகம்மது நடத்தினார். ஜமாத் துணைத் தலைவர் எஸ். சம்சுதீன், துணைச் செயலர் ஏ.எம். முகைதீன், பொருளாளர் மு. சாகுல்ஹூசேன், நி்ர்வாகிகள் உள்பட திரளாக கலந்து கொண்டனர்.

பெண்களும் இத்தொழுகையில் பங்கேற்றனர். தொழுகை முடிந்ததும் ஒருவருக்கொருவர் பக்ரீத் வாழ்த்துக்களை தெரிவித்துக் கொண்டனர்.

கல்லிடைக்குறிச்சி பெரிய ஜூம்ஆ பள்ளிவாசலில் நடைபெற்ற தொழுகையில் ஜமாத் தலைவர் கே.எஸ். அப்துல்மஜித், இமாம் முஹிபுல்லாஹ் உள்ளிட்டோர் பங்கேற்றனர். தொழுகை முடிந்ததும் குர்பானி கொடுக்கப்பட்டது. பொட்டல்புதூர் பள்ளிவாசலில் நடைபெற்ற தொழுகையினை இமாம் பி.ஷேக்மன்சூர்மிஸ்பாஹி நடத்தினார். ஜமாத் நிர்வாகிகள் உள்பட ஏராளமானோர் கலந்து கொண்டனர்.

விக்கிரமசிங்கபுரம், முதலியார்பட்டி, ரவணசமுத்திரம், பள்ளக்கால்பொதுக்குடி, அம்பாசமுத்திரம், வீரவநல்லூர், அரிகேசவநல்லூர், சேரன்மகாதேவி, பத்தமடை, மேலச்செவல் உள்பட பல்வேறு பகுதியில் பக்ரீத் தொழுகை நடைபெற்றது.