துரைமுருகன் வலியுறுத்தல்: காவல்துறை டிஜிபி ராஜேந்திரன் பேரவைக்கு வருகை

சென்னை: காவல்துறை மானியக் கோரிக்கையின் போது தமிழக காவல்துறை டிஜிபி பேரவையில் இருக்க வேண்டும் என்று துரைமுருகன் வலியுறுத்தியதைத் தொடர்ந்து டிஜிபி ராஜேந்திரன் சட்டப்பேரவைக்கு வருகை தந்தார்.

தமிழக சட்டப்பேரவையில் இன்று காவல்துறை மானியக் கோரிக்கை மீதான விவாதத்தில் பேச எழுந்த துரைமுருகன், தமிழக சட்டப்பேரவையில் காவல்துறை மானியக் கோரிக்கை நடைபெறும் போது, காவல்துறை டிஜிபி,  காவல்துறை ஆணையர் இருக்க வேண்டும். அவர்கள் எங்கே? அவர்கள் வந்தால் தான் மானிய கோரிக்கை மீதான விவாதத்தில் பேசுவேன். அவைக்கு என்று ஒரு மரபு உண்டு என்று கூறினார்.

தலைமை மற்றும் உள்துறை செயலாளர்கள் இருக்கிறார்கள் பேசுங்கள் என்று கூறிய முதல்வர் பழனிசாமி, என்னுடைய மானியக் கோரிக்கை மீதான விவாதத்தில் துரைமுருகன் பேசுவது மகிழ்ச்சி அளிக்கிறது. ஆனால், மானியக் கோரிக்கை விவாதத்தை பிரச்னையுடன் துரைமுருகன் தொடங்குவது வருத்தம் அளிக்கிறது என்று கூறினார்.

மேலும், காவல்துறை அதிகாரிகளின் மனு அழுத்தத்தைக் குறைக்க நடவடிக்கை எடுக்க வேண்டும், அவர்களுக்கு கவுன்சிலிங் அளிக்க வகை செய்ய வேண்டும் என்றார் துரைமுருகன்.

தமிழகத்தில் கோவை சசிகுமார், சேலம் ரயிலில் கொள்ளை போன்ற பல முக்கிய வழக்குகள் விசாரிக்கப்படாமல் இருப்பது குறித்தும் துரைமுருகன் கேள்வி எழுப்பினார்.

அதற்கு பதில் அளித்த முதல்வர் பழனிசாமி, துரைமுருகன் குறிப்பிடும் வழக்குகள் புலன் விசாரணையில் இருப்பதாகக் கூறினார்.

தமிழகத்தில் கொலை, கொள்ளை அதிகரித்திருப்பதாக துரைமுருகன் குற்றம்சாட்டியதற்கு பதில் அளித்த முதல்வர் பழனிசாமி, கொலை, கொள்ளை நடப்பது என்பது அனைத்து மாநிலங்களிலும் இயல்புதான். தமிழகத்தில் கொலை, கொள்ளைகளில் ஈடுபடுபவர்களை உடனடியாக கண்டுபிடித்து காவல்துறை நடவடிக்கை எடுக்கிறது. மற்ற மாநிலங்களைவிட தமிழகத்தில் குற்றங்கள் குறைவுதான் என்று பழனிசாமி கூறினார்.