புதுக்கோட்டை அரசு மருத்துவக் கல்லூரி திறப்பு விழாவில் பங்கேற்க வந்த 3 திமுக எம்எல்ஏக்கள்  கைது

புதுக்கோட்டை: புதுக்கோட்டை அரசு மருத்துவக் கல்லூரி, மருத்துவமனை திறப்பு விழாவில் பங்கேற்க வந்த 3 திமுக எம்எல்ஏக்கள் கைது செய்யப்பட்டனர்.

புதுக்கோட்டையில் இன்று அரசு மருத்துவக் கல்லூரி, மருத்துவமனையை, முதல்வர் எடப்பாடி பழனிசாமி திறந்து வைத்தார். விழாவில் சுகாதாரத் துறை அமைச்சர் விஜயபாஸ்கர், எம்.பி. தம்பிதுரை உள்ளிட்டோர் கலந்து கொண்டனர்.

இந்த விழாவில் கலந்து கொள்ள வந்த திமுக எம்எல்ஏக்கள் பெரியண்ணன் அரசு, ரகுபதி, மெய்யழகன் ஆகியோர் கைது செய்யப்பட்டனர்.

புதுக்கோட்டை அரசு மருத்துவக் கல்லூரி மருத்துவமனை திறப்பு விழாவில் பங்கேற்க வந்த திமுக எம்எல்ஏக்களை தடுத்து நிறுத்தி காவல்துறை கைது செய்ததாக எம்எல்ஏக்கள் குற்றம்சாட்டியுள்ளனர்.

ஆனால், மருத்துவக் கல்லூரி திறப்பு விழாவில் திமுக எம்எல்ஏக்கள் கலந்து கொண்டால் பிரச்னை ஏற்படும் என்று கூறி அவர்கள் கலந்து கொள்ள காவல்துறை அனுமதி மறுத்ததாகவும், இதனைக் கண்டித்து மூன்று எம்எல்ஏக்களும் பிருந்தாவன் சாலை சந்திப்பில் சாலை மறியலில் ஈடுபட்டதாகவும் அதனாலேயே திமுக எம்எல்ஏக்கள் பெரியண்ணன் அரசு, ரகுதி, மெய்யழகன் ஆகியோர் கைது செய்யப்பட்டதாகவும் காவல்துறை தரப்பில் தெரிவிக்கப்பட்டுள்ளது.

அதே சமயம், நாங்கள் சாலை மறியலில் ஈடுபட்டதாகக் கூறப்படும் தகவலில் உண்மையில்லை என்றும் திமுக எம்எல்ஏக்கள் கூறியுள்ளனர்.

இது குறித்து எம்எல்ஏக்கள் கூறுகையில், விழாவில் பங்கேற்க வருமாறு அமைச்சர் விஜயபாஸ்கர் தொலைபேசியில் அழைப்பு விடுத்ததாகவும், எங்களுக்கு விழா அழைப்பிதழ் கொடுக்கப்பட்டதாலேயே நாங்கள் நிகழ்ச்சிக்கு வந்ததாகவும், இந்த விழாவில் நாங்கள் கலந்து கொண்டால் திமுகவுக்கு நல்ல பெயர் கிடைத்துவிடும் என்று கருதியே ஆளும்கட்சியினர் கைது நடவடிக்கையை மேற்கொண்டுள்ளனர் என்றும் எம்எல்ஏக்கள் குற்றம்சாட்டியுள்ளனர்.