நியாய விலைக் கடைகளில் கண்காணிப்பு கேமரா: அறிக்கை தாக்கல் செய்ய உத்தரவு

ரேஷன் பொருள்கள் கள்ளச்சந்தையில் விற்கப்படுவதைத் தடுக்க அனைத்து நியாய விலைக் கடைகளிலும் கண்காணிப்பு கேமரா பொருத்துவது தொடர்பாக தமிழக அரசு அறிக்கை தாக்கல் செய்ய உயர் நீதிமன்றம் உத்தரவிட்டுள்ளது. 
சென்னை அபிராமபுரத்தில் உள்ள நியாய விலைக் கடையில் கடந்த 2010-ஆம் ஆண்டு கூட்டுறவு சங்கங்களின் கூடுதல் பதிவாளர் தலைமையில் திடீர் சோதனை நடத்தப்பட்டது. அப்போது ரேஷன் பொருள்கள் விதிகளுக்கு முரணாக விற்பனை செய்யப்படுவதை அதிகாரிகள் கண்டறிந்தனர். மேலும், அந்த நியாய விலைக் கடையில் பணியாற்றிய கீதா என்ற பணியாளரை பணியிடை நீக்கம் செய்து உத்தரவிட்டனர். இந்த உத்தரவை ரத்து செய்யக் கோரி சென்னை உயர் நீதிமன்றத்தில் கீதா வழக்கு தொடர்ந்தார்.
இந்த வழக்கு நீதிபதி டி.கிருஷ்ணகுமார் முன் விசாரணைக்கு வந்தது. வழக்கை விசாரித்த நீதிபதி, குடும்ப அட்டைகள் மின்னணு குடும்ப அட்டைகளாக மாற்றப்பட்டிருந்தாலும், ரேஷன் பொருள்கள் கள்ளச்சந்தையில் விற்கப்படுவதை தடுக்க முடியவில்லை என வேதனை தெரிவித்தார். மேலும் இதுபோன்ற முறைகேடுகளைத் தடுக்க அனைத்து நியாய விலைக் கடைகளிலும் கண்காணிப்புக் கேமராக்களைப் பொருத்துவது தொடர்பாக அரசுத் தரப்பில் அறிக்கை தாக்கல் செய்ய உத்தரவிட்டு, விசாரணையை ஒத்திவைத்தார்.