அய்யாக்கண்ணுவை கைது செய்தது ஏன்?: முதல்வர் விளக்கம்

தென்னிந்திய நதிகள் இணைப்புச் சங்கத் தலைவர் அய்யாக்கண்ணுவைக் கைது செய்தது ஏன் என்று சட்டப்பேரவையில் முதல்வர் எடப்பாடி பழனிசாமி விளக்கம் அளித்தார்.
சட்டப்பேரவையில் எதிர்க்கட்சித் துணைத் தலைவர் துரைமுருகன் பேசியது: சட்டப்பேரவையில் எதிர்க்கட்சித் தலைவர் ஸ்டாலினுக்குத் தனி அறை உண்டு. அவரைச் சந்திக்கப் பலர் வருவர். ஸ்டாலினைச் சந்திக்க அய்யாக்கண்ணு அனுமதி பெற்றிருந்தார். அதைத் தடுக்கும் வகையில் அவரை காவலர்கள் கைது செய்து வடபழனி காவல் நிலையத்துக்கு அழைத்துச் சென்றுவிட்டனர் என்றார்.
பின்னர் முதல்வர் எடப்பாடி பழனிசாமி அளித்த விளக்கம்: அய்யாக்கண்ணு கைது செய்யப்பட்டது பற்றிய பிரச்னையை துரைமுருகன் அவைக்குக் கொண்டு வந்தார். சென்னையில் எந்தெந்த இடத்தில் போராட்டங்கள் நடத்துவது என்பது குறித்து அறிவிப்பு உள்ளது. அதன்படி பூந்தமல்லி, மாதவரம், அம்பத்தூர் ஆகிய பகுதிகளில் போராட்டம் நடத்த அய்யாக்கண்ணு அனுமதிக்கப்பட்டிருந்தார்.
ஆனால், வடபழனியில் அவர் துண்டுப் பிரசுரம் அளித்தார். அதனால் கைது செய்யப்பட்டுள்ளார். ஸ்டாலினைச் சந்திக்க வந்தார் என்பதற்காகக் கைது செய்யப்படவில்லை என்றார்.
வடபழனியில் துண்டுப் பிரசுரம் வழங்கியதற்காக கைது செய்யப்பட்ட அய்யாக்கண்ணு, பின்னர் விடுவிக்கப்பட்டார்.