புதுவை அரசு ஊழியர்களுக்கு தீபாவளி போனஸ் அறிவிப்பு

புதுவை அரசு ஊழியர்களுக்கான தீபாவளி போனஸை முதல்வர் வே.நாராயணசாமி அறிவித்துள்ளார்.
இதுகுறித்து திங்கள்கிழமை அவர் வெளியிட்ட செய்திக் குறிப்பு:
புதுவை அரசுத் துறைகளில் பணியாற்றும் அரசிதழ் பதிவு பெறாத பி-பிரிவு அலுவலர்கள் மற்றும் அனைத்து சி-பிரிவு ஊழியர்களுக்கு நிகழ் நிதியாண்டுக்கான போனஸ் வழங்குவதற்கான ஒப்புதலை அரசு வழங்கியுள்ளது. இதற்கான அரசாணை நிதித் துறையின் மூலம் வெளியிடப்பட்டு ஊழியர்களுக்கு உடனடியாக போனஸ் வழங்கப்படும்.
இதன்படி, அரசுத் துறைகளில் பணியாற்றும் பி -பிரிவு அலுவலர்கள் மற்றும் அனைத்து சி-பிரிவு ஊழியர்களுக்கு போனஸ் தொகையாக அதிகபட்சமாக ரூ.6,908 கிடைக்கும். மூன்று ஆண்டுகளுக்கு மேல் பணிபுரியும் தினக்கூலி ஊழியர்களுக்கு போனஸ் தொகை அதிகபட்சமாக ரூ. 1,184/- வழங்கப்படும்.
இதற்காக புதுவை அரசுக்கு ரூ.18 கோடி கூடுதலாகச் செலவாகும். உற்பத்தி சார்ந்த அரசு நிறுவனங்களுக்கு வழங்கப்பட வேண்டிய போனஸ் தொகை குறித்த அறிவிப்பு மத்திய அரசிடமிருந்து பெறப்பட்டவுடன், அதுகுறித்து அறிவிக்கப்படும்.