காற்றழுத்த தாழ்வு மண்டலம்: மீனவர்களுக்கு எச்சரிக்கை

வடமேற்கு வங்கக்கடலில் உருவான காற்றழுத்த தாழ்வு மண்டலம் மேலும் வலுவடைந்துள்ளதை அடுத்து வடமேற்கு வங்கக் கடல் பகுதிகளுக்கு மீனவர்கள் செல்ல வேண்டாம் என்று சென்னை வானிலைஆய்வு மையம் எச்சரித்துள்ளது.
வெப்பச் சலனம் காரணமாக, தமிழகம் மற்றும் புதுச்சேரியில் ஓரிரு இடங்களில் அடுத்த 24 மணி நேரத்தில் மழையோ அல்லது இடியுடன் கூடிய மழையோ பெய்ய வாய்ப்பு உள்ளது. சென்னையில் வானம் மேகமூட்டமாகக் காணப்படும். மாலை, இரவு நேரங்களில் இடி, மின்னல் உருவாகக் கூடும். நகரின் ஒருசில பகுதிகளில் லேசான மழை பெய்ய வாய்ப்பு உள்ளது.
மீனவர்களுக்கு எச்சரிக்கை: வடதமிழகம் மற்றும் புதுச்சேரி கடலோரப் பகுதிகளில் தென்மேற்கு மற்றும் தெற்கு திசையில் இருந்தும், தென்தமிழக கடலோரப் பகுதிகளில் தென்மேற்கு மற்றும் மேற்கு திசையில் இருந்தும் பலமான காற்று வீசக்கூடும். 
வடமேற்கு வங்கக் கடலில் காற்றழுத்தத் தாழ்வு மண்டலம் உருவாகியுள்ளது. அது வியாழக்கிழமை வலுவடைந்து, தீவிர காற்றழுத்தத் தாழ்வு மண்டலமாக மாறி வடமேற்கு நோக்கி நகர்கிறது. இந்த தீவிர காற்றழுத்தத் தாழ்வு மண்டலம் காரணமாக, வடக்கு மற்றும் வடமேற்கு வங்கக்கடல் பகுதிகளில் கடல் கொந்தளிப்பாகக் காணப்படும். எனவே, அப்பகுதிகளுக்கு மீனவர்கள் செல்ல வேண்டாம் என்று வானிலை ஆய்வு மையம் தெரிவித்துள்ளது.