அரிச்சல்முனை கடற்கரையில் 105 சித்தாமை முட்டைகள் கண்டெடுப்பு

தனுஷ்கோடி அரிச்சல்முனை கடற்கரையில் 105 சித்தாமை முட்டைகளை வனத்துறை அதிகாரிகள் மீட்டு பொறிப்பகத்தில் வைத்துள்ளனர். 
ராமநாதபுரம் மாவட்டம் மன்னார் வளைகுடா கடல் பகுதியில் காணப்படும் அரிய வகை கடல் சித்தாமைகள் டிசம்பர் முதல் மார்ச் வரையில் தனுஷ்கோடி அரிச்சல்முனை கடற்கரையில் வந்து முட்டையிட்டு செல்வது வழக்கம். கடந்த ஆண்டு 25 ஆயிரம் ஆமைகள் முட்டைகளை விட்டு சென்றன. அவை மீட்கப்பட்டு ஆமை குஞ்சு பொறிப்பக காப்பத்தில் பாதுகாத்து வைக்கப்பட்டன. இதில் பொறிக்கப்பட்ட 95 சதவீதம் குஞ்சுகள் கடலில் விட்டப்பட்டன. 
இந்நிலையில், கடந்த ஆண்டு நவம்பர் மாதத்தில் ஏற்பட்ட கஜா புயல் காரணமாக ஆமைகள் டிசம்பர் மாதம் வரவில்லை. ஒரு மாதம் கடந்த நிலையில் முதல் முறையாக திங்கள்கிழமை அதிகாலையில் 105 முட்டைகளை ஆமைகள் இட்டுச் சென்றுள்ளன.
இதனையடுத்து வனச்சரக அலுவலர் சு. சதீஷ் தலைமையில் மன்னார் வளைகுடா கடல் பகுதி ஆமை முட்டை பாதுகாப்பு காவலர்கள் மற்றும் வனத்துறையினர் 105 முட்டைகளையும் மீட்டு குஞ்சு பொறிப்பக காப்பகத்தில் பாதுகாப்புடன் வைத்தனர். 
இந்த ஆண்டு 20 ஆயிரம் முட்டைகள் கிடைக்கும். கரையோரம் ஆமைகள் முட்டையிட வரும் அதிகாலை 2 மணி முதல் 5 மணி வரையில் கரை வலை மீனவர்கள் வலைகளை கரையோரம் போட வேண்டாம். இந்த முட்டைகள் 50 நாள் முதல் 70 நாள்களுக்குள் குஞ்சு பொறித்தவுடன் கடலில் விடப்படும் என வனச்சரக அலுவலர் சதீஷ் தெரிவித்தார்.