திமுக அடிப்படை உறுப்பினர் பதவியில் இருந்து கு.க. செல்வம் நீக்கம்

சென்னை: திமுக அடிப்படை உறுப்பினர் பதவியில் இருந்து ஆயிரம்விளக்குத் தொகுதி சட்டப்பேரவை உறுப்பினர் கு.க செல்வம் நீக்கப்பட்டுள்ளதாக கட்சியின் தலைவர் மு.க. ஸ்டாலின் அறிவித்துள்ளார்.

பாஜக தேசியத் தலைவா் ஜெ.பி.நட்டாவைச் சந்தித்த நிலையில், ஆயிரம்விளக்கு தொகுதி சட்டப்பேரவை உறுப்பினா் கு.க. செல்வத்தை திமுகவிலிருந்து இடைநீக்கம் செய்யப்பட்டிருந்த நிலையில், தற்போது, திமுகவின் அடிப்படை உறுப்பினர் மற்றும் அனைத்து பொறுப்பிலிருந்தும் நிரந்தரமாக நீக்கப்படுவதாக திமுக தலைமைக் கழகம் அறிவித்துள்ளது.

இதையும் படிக்கலாமே... இடைநீக்கம் செய்திருப்பது இயற்கை நீதிக்கு எதிரானது: திமுகவுக்கு கு.க.செல்வம் விளக்கம்

இது குறித்து திமுக வெளியிட்டிருக்கும் அறிக்கையில்,

திமுக தலைமை நிலைய அலுவலகச் செயலாளர் மற்றும் தலைமைச் செயற்குழு உறுப்பினர் பொறுப்புகளிலிருந்து விடுவிக்கப்பட்ட கு.க. செல்வம் கட்சியின் கட்டுப்பாட்டை மீறியும், கட்சிக்கு அவப்பெயர் ஏற்படும் வகையிலும் செயல்பட்டு வந்ததால், அவரிடம் கேட்கப்பட்ட விளக்கத்துக்கு அளித்த பதில் ஏற்றுக் கொள்ளும்படி இல்லாத காரணத்தால், அவர் அடிப்படை உறுப்பினர் உள்ளிட்ட அனைத்துப் பொறுப்பிலிருந்தும் நிரந்தரமாக நீக்கி வைக்கப்படுகிறார் என்று தெரிவிக்கப்பட்டுள்ளது.