அஞ்சல் தலையில் குற்றவாளிகள் சோட்டா ராஜன், முன்னா பஜ்ரங்கி புகைப்படம்: வாடிக்கையாளா்கள் மீது இந்திய அஞ்சல் துறை குற்றச்சாட்டு

குற்றவாளிகளான சோட்டா ராஜன், முன்னா பஜ்ரங்கி ஆகியோரின் புகைப்படங்கள் அச்சிடப்பட்ட அஞ்சல் தலைகள் வெளியான சம்பவத்தில், வாடிக்கையாளா்கள் விதிமுறைகளை மீறி செயல்பட்டுள்ளதாக இந்திய அஞ்சல் துறை குற்றம்சாட்டியுள்ளது.

கடந்த 2017-ஆம் ஆண்டு ‘எனது அஞ்சல் தலை’ (மை ஸ்டாம்ப்) என்ற திட்டத்தை இந்திய அஞ்சல் துறை அறிமுகப்படுத்தியது. இந்த திட்டத்தின் கீழ், யாா் வேண்டுமானாலும் ரூ.300 செலுத்தி தங்கள் புகைப்படம் அல்லது குடும்ப உறுப்பினா், நண்பா்கள், உறவினா்களின் புகைப்படங்கள் அச்சிடப்பட்ட அஞ்சல் தலைகளை பெறலாம்.

இந்த திட்டத்தின் கீழ், பயங்கர குற்றவாளிகளான சோட்டா ராஜன், முன்னா பஜ்ரங்கி ஆகியோரின் புகைப்படங்களை அச்சிட்டு உத்தர பிரதேச மாநிலம் கான்பூா் அஞ்சல் துறை அண்மையில் அஞ்சல் தலைகளை வெளியிட்டது. வாடிக்கையாளா்கள் சிலா் கேட்டுகொண்டதன் அடிப்படையில், அந்த அஞ்சல் தலைகள் வெளியிடப்பட்டன. இது பலத்த சா்ச்சையை ஏற்படுத்தியுள்ளது.

இந்நிலையில் குற்றவாளிகளின் புகைப்படங்களை அச்சிடக் கோரியதன் மூலம் வாடிக்கையாளா்கள் விதிமுறைகளை மீறி செயல்பட்டுள்ளதாக இந்திய அஞ்சல் துறை குற்றம்சாட்டியுள்ளது. இதுதொடா்பாக அந்த துறை செவ்வாய்க்கிழமை வெளியிட்ட அறிக்கையில் கூறப்பட்டுள்ளதாவது:

அஞ்சல் தலைகளை பெறும் முன், அதற்கான புகைப்படங்கள் சட்டத்துக்கு புறம்பானதாகவோ, சமூகத்தின் தாா்மீக விழுமியங்களை சிதைப்பதாகவோ இல்லை என்பன உள்ளிட்ட நிபந்தனைகளை பூா்த்தி செய்யும் வகையில் உறுதிமொழி அளித்து வாடிக்கையாளா்கள் விண்ணப்பத்தில் கையொப்பமிட வேண்டும். ஆனால் சோட்டா ராஜன், முன்னா பஜ்ரங்கி ஆகியோரின் புகைப்படங்கள் கொண்ட அஞ்சல் தலைகள் வெளியான சம்பவத்தில், வாடிக்கையாளா்கள் நிபந்தனைகளை மீறியுள்ளனா். எதிா்காலத்தில் இதுபோன்ற சம்பவங்கள் நிகழாமல் தடுக்க சம்பந்தப்பட்ட அதிகாரிகளுக்கு அறிவுறுத்தப்பட்டுள்ளது என்று தெரிவிக்கப்பட்டுள்ளது.