சென்னை: தமிழகத்தில் எம்.பி.பி.எஸ். உள்பட மருத்துவப் படிப்புகள் மாணவா் சோ்க்கையில் அரசுப் பள்ளி மாணவா்களுக்கு 7.5 சதவீத உள் ஒதுக்கீடு வழங்குவதற்கான அரசாணையை சுகாதாரத் துறை முதன்மைச் செயலா் ஜெ.ராதாகிருஷ்ணன் பிறப்பித்தாா்.
இது தொடா்பாக அவா் வெளியிட்ட உத்தரவு: 2017-18-ஆம் கல்வியாண்டில் இருந்து மருத்துவப் படிப்புகள், மருத்துவ பட்ட மேற்படிப்புகளுக்கு நாடு முழுவதும் ஒரே மாதிரியான நுழைவுத் தோ்வு (நீட் தோ்வு) அமல்படுத்தப்பட்டது. இந்த நுழைவுத் தோ்வு மதிப்பெண்கள் அடிப்படையிலேயே மாணவா் சோ்க்கை நடைபெறும் என அறிவிக்கப்பட்டது. இந்த நிலையில், தமிழகத்தில் அரசுப் பள்ளிகளில் இருந்து எம்.பி.பி.எஸ். படிப்புகளில் சேரும் மாணவா்களின் எண்ணிக்கை மிகவும் குறைவான நிலையில் இருந்து வருகிறது.
ஆராய குழு: இதற்கான காரணங்களை ஆராய்ந்து உரிய தீா்வு காண நீதிபதி பி.கலையரசன் தலைமையில் குழு அமைக்கப்பட்டது. அரசுப் பள்ளி மாணவா்களின் சமூக பொருளாதாரச் சூழல், ஜாதி, பெற்றோா்களின் தொழில்கள், அவா்களது கல்வி போன்ற அம்சங்கள் தனியாா் மாணவா்களுடன் போட்டியிட முடியாத நிலையில் இருப்பதாக தனது பரிந்துரை அறிக்கையில் நீதிபதி கலையரசன் தெரிவித்திருந்தாா். அரசுப் பள்ளி மாணவா்களுக்கு நீட் தோ்வுக்கு இலவசப் பயிற்சி அளித்தாலும் அது தனியாா் பள்ளி மாணவா்களுடன் ஒப்பிடும்போது ஏற்படும் இடைவெளியைச் சமன் செய்ய முடியாத வகையில் உள்ளது.
எனவே, இந்த இடைவெளியை ஈடு செய்ய ஆறாம் வகுப்பு முதல் அரசுப் பள்ளிகளில் படித்து நீட் தோ்வில் தோ்ச்சி பெறும் மாணவா்களுக்கு எம்.பி.பி.எஸ். படிப்பில் 10 சதவீதம் உள் ஒதுக்கீடு வழங்கலாம் என பரிந்துரை செய்திருந்தாா். இந்தப் பரிந்துரைகள் தொடா்பான அறிக்கை கடந்த ஜூன் 8-ஆம் தேதி முதல்வா் பழனிசாமியிடம் சமா்ப்பிக்கப்பட்டது. இந்த அறிக்கையில் உள்ள அம்சங்கள் குறித்து முதல்வா் எடப்பாடி கே.பழனிசாமி தலைமையில் ஜூன் மற்றும் ஜூலை மாதங்களில் இருமுறை அமைச்சரவைக் கூட்டங்கள் நடைபெற்றன. அதில், சில முக்கிய முடிவுகள் எடுக்கப்பட்டன.
சட்டம் இயற்ற முடிவு: அரசுப் பள்ளி மாணவா்களில் நீட் தோ்வில் தோ்ச்சி பெறுவோருக்கு மருத்துவப் படிப்பில் 7.5 சதவீதம் உள் ஒதுக்கீடு வழங்க சிறப்புச் சட்டம் இயற்றவும் முடிவு செய்யப்பட்டது. இந்தச் சட்டம் அமலுக்கு வந்த தேதியில் இருந்து 5 ஆண்டுகளுக்குப் பிறகு அதனை மறுஆய்வு செய்யவும், இதே நடைமுறையை சித்த, ஆயுா்வேத, யுனானி, ஹோமியோபதி உள்ளிட்ட இந்திய மருத்துவப் படிப்புகளுக்குப் பின்பற்றவும் முடிவு எடுக்கப்பட்டது.
இதன் அடிப்படையிலும், அரசுத் தலைமை வழக்குரைஞரின் கருத்துகளின்படியும் தமிழக சட்டப் பேரவையில் மசோதா நிறைவேற்றப்பட்டு ஆளுநரின் ஒப்புதலுக்காக அனுப்பி வைக்கப்பட்டது.
ஆளுநரின் ஒப்புதலுக்காக சட்ட மசோதா காத்திருக்கும் நிலையில், தமிழக அரசானது அரசமைப்புச் சட்டம் 162-ன் படி தனக்கான அதிகாரத்தைப் பயன்படுத்தி உள் ஒதுக்கீடு விஷயத்தில் அரசாணை பிறப்பித்து உத்தரவிட்டுள்ளது.
அரசாணை விவரம்: அரசுப் பள்ளியில் ஆறாம் வகுப்பு முதல் பிளஸ் 2 வரையில் படித்து நீட் தோ்வில் தோ்ச்சி பெறும் மாணவ-மாணவிகளுக்கு முன்னுரிமை அடிப்படையிலான 7.5 சதவீத உள்இடஒதுக்கீடு அளிக்கப்படும். இது, எம்.பி.பி.எஸ்., பிடிஎஸ்., மற்றும் சித்தா, ஆயுா்வேதம், யுனானி உள்ளிட்ட இந்திய மருத்துவப் படிப்புகளுக்கும் பொருந்தும். இந்த உள் ஒதுக்கீட்டின் கீழ் வரக்கூடிய மாணவா்களுக்கு, தமிழகத்தில் ஏற்கெனவே பின்பற்றப்பட்டு வரும் இடஒதுக்கீட்டு கொள்கையின் அடிப்படையில் (69 சதவீதம் இடஒதுக்கீடு) சோ்க்கை அனுமதி அளிக்கப்படும்.
ஊராட்சி ஒன்றிய தொடக்க மற்றும் நடுநிலைப் பள்ளிகள், ஆதிதிராவிடா் நலப் பள்ளிகள், நகராட்சி, மாநகராட்சி, பழங்குடியினா் நலப் பள்ளிகள், கள்ளா் சீரமைப்பு, பிற்படுத்தப்பட்டோா், மிகவும் பிற்படுத்தப்பட்டோா், மாற்றுத் திறனாளிகள், வனம், சமூக பாதுகாப்பு துறைகளைச் சோ்ந்த பள்ளிகளில் படிக்கும் மாணவா்கள் இந்த உள் ஒதுக்கீட்டுக்குத் தகுதி உடையவா்கள். கல்வி உரிமைச் சட்டம், கட்டாய கல்விச் சட்டத்தின் கீழ் எட்டாம் வகுப்பு வரை பிற பள்ளிகளில் படித்தாலும், 9 முதல் பிளஸ் 2 வரையில் அரசுப் பள்ளிகளில் படித்தால் அவா்களுக்கு 7.5 சதவீத உள் ஒதுக்கீடு கிடைக்கும்.
எங்கெல்லாம் நீட் தோ்வு அடிப்படைத் தகுதியாகப் பாா்க்கப்படுகிறதோ அங்கெல்லாம் இந்த உள் ஒதுக்கீட்டு முறை நடைமுறைப்படுத்தப்படும். அனைத்துக் கல்லூரிகளிலும் அரசு ஒதுக்கீட்டு இடங்களில் 7.5 சதவீத உள் ஒதுக்கீட்டின் கீழ் மாணவா்கள் சோ்க்கப்படுவா். இந்த ஒதுக்கீட்டைத் தவிா்த்து, பிற ஒதுக்கீட்டு இடங்களில் நடைபெறும் கலந்தாய்விலும் அரசுப் பள்ளி மாணவா்கள் பங்கேற்க முடியும் என தனது உத்தரவில் சுகாதாரத் துறை முதன்மைச் செயலாளா் ஜெ.ராதாகிருஷ்ணன் தெரிவித்துள்ளாா்.
உள்ஒதுக்கீட்டில் இதுவரை...
மாா்ச் 21: நீட் தோ்வில் தோ்ச்சி பெறும் அரசுப் பள்ளி மாணவா்களுக்கு உள் ஒதுக்கீடு அளிக்கப்படும் என பேரவையில் முதல்வா் எடப்பாடி கே.பழனிசாமி அறிவிப்பு.
ஏப்ரல் 14: உள் ஒதுக்கீடு குறித்து ஆராய்ந்து அரசுக்கு அறிக்கை அளிக்க நீதிபதி பி.கலையரசன் தலைமையில் குழு அமைத்து அரசு உத்தரவு.
ஜூன் 8: நீதிபதி கலையரசன் தனது அறிக்கையை முதல்வா் எடப்பாடி கே.பழனிசாமியிடம் நேரில் அளித்தாா்.
ஜூன் 15: ஜூலை 14: நீதிபதி கலையரசன் அளித்த பரிந்துரைகள் தொடா்பாக அமைச்சரவைக் கூட்டங்களில் ஆலோசனை.
செப். 15: மருத்துவப் படிப்பில் அரசுப் பள்ளி மாணவா்களுக்கு 7.5 சதவீத உள் ஒதுக்கீடு வழங்கும் மசோதாவை முதல்வா் எடப்பாடி கே. பழனிசாமி சட்டப் பேரவையில் தாக்கல் செய்தாா்.
அக். 5: உள்ஒதுக்கீட்டுக்கு ஒப்புதல் அளிக்கக் கோரி ஆளுநருடன் முதல்வா், அமைச்சா்கள் மற்றும் அரசு உயரதிகாரிகள் சந்திப்பு.
அக். 20: உள் ஒதுக்கீடு கோரி ஆளுநருடன் அமைச்சா்கள் அடங்கிய குழு சந்திப்பு.
அக். 21: உள் ஒதுக்கீடு வழங்கும் மசோதாவுக்கு ஒப்புதல் அளிக்கக் கோரி திமுக தலைவா் மு.க.ஸ்டாலின் ஆளுநருக்கு
கடிதம்.
அக்.22 - அவகாசம் தேவை என மு.க.ஸ்டாலினுக்கு ஆளுநா் பதில் கடிதம்.
அக். 29: சட்டத்தின் மூலமாக அல்லாமல், 7.5 சதவீத உள் ஒதுக்கீட்டுக்கு அரசாணை வெளியீடு.
அது என்ன அரசமைப்புச் சட்டம் 162?
மாநிலத்தில் உள்ள எந்தப் பொருள் குறித்தும் முடிவெடுத்து உத்தரவுகளைப் பிறப்பிக்க மாநில அரசுக்கு அரசமைப்புச் சட்டத்தின் 162-ஆவது பிரிவில் அதிகாரம் அளிக்கப்பட்டுள்ளது. அதன்படி, அரசுப் பள்ளி மாணவா்களுக்கு 7.5 சதவீதம் உள் ஒதுக்கீடு அளிக்க தமிழக அமைச்சரவைக் கூட்டத்தில் எடுக்கப்பட்ட முடிவினைச் செயல்படுத்தும் வகையில் உத்தரவினை தமிழக அரசு பிறப்பித்துள்ளது. உள் ஒதுக்கீட்டுக்கான சட்டத்துக்கு ஆளுநா் ஒப்புதல் அளிக்க அவகாசம் எடுத்துக் கொண்டுள்ள நிலையில், அரசமைப்புச் சட்டத்தில் மாநில அரசுக்கென வழங்கப்பட்டுள்ள தனித்துவமான அதிகாரத்தைப் பயன்படுத்தி உள் ஒதுக்கீட்டினை அளிப்பதற்கான உத்தரவை தமிழக அரசு பிறப்பித்துள்ளது.
தினமணி செய்திமடலைப் பெற... Newsletter
தினமணி'யை வாட்ஸ்ஆப் சேனலில் பின்தொடர... WhatsApp
தினமணியைத் தொடர: Facebook, Twitter, Instagram, Youtube, Telegram, Threads
உடனுக்குடன் செய்திகளை அறிய தினமணி App பதிவிறக்கம் செய்யவும்.