மானாமதுரை: சிவகங்கை மாவட்டம் மானாமதுரைக்கு செவ்வாய்கிழமை வந்த தமிழக முதல்வர் எடப்பாடி பழனிசாமிக்கு அதிமுகவினர் திரண்டு வந்து வரவேற்பளித்தனர்.
ராமநாதபுரம் மாவட்டத்தில் கரோனா தொற்று தடுப்பு நடவடிக்கை பணியை ஆய்வு செய்யவும் நலத்திட்ட உதவிகள் வழங்கவும் முதல்வர் பழனிசாமி மதுரையிலிருந்து கார் மூலம் ராமநாதபுரம் சென்றார்.
வழியில் மானாமதுரை பேருந்து நிலையம் முன்பு அதிமுகவினர் திரண்டு நின்று மேளதாளம் முழங்க அவருக்கு வரவேற்பளித்தனர். தமிழக காதி கிராமத் தொழில்கள்துறை அமைச்சர் ஜி.பாஸ்கரன் தலைமையிலும் மானாமதுரை எம்.எல்.ஏ நெட்டூர் எஸ்.நாகராஜன் முன்னிலையிலும் நடைபெற்ற வரவேற்பு நிகழ்ச்சியில் அதிமுகவினர் திரண்டு நின்று முதல்வரை வரவேற்றனர்.
பெண்கள் பழனிசாமி வந்த காரின் மீது பூக்களைத் தூவி வரவேற்பு கொடுத்தனர். வரவேற்பு நிகழ்ச்சியில் முன்னாள் சட்டமன்ற உறப்பினர் எம்.குணசேகரன், அதிமுக மானாமதுரை ஒன்றியச் செயலாளர்கள் ஜெயபிரகாஷ், சிவ சிவ ஸ்ரீதரன், நகர்ச் செயலாளர் விஜி.போஸ்,தகவல் தொழில்நுட்ப அணி நெட்டூர் எஸ்.கே.பாலா, கூட்டுறவு அமைப்புகளின் நிர்வாகிகள் கே.முனியசாமி, சின்னை மாரியப்பன், தெய்வேந்திரன் உள்ளிட்டோர் கலந்து கொண்டனர். முன்னதாக திருப்புவனத்திலும் அதிமுகவினர் ஏராளமானோர் முதல்வர் பழனிசாமிக்கு வரவேற்பளித்தனர்,