போலி நீட் மதிப்பெண் சான்றிதழ்: தலைமறைவான மாணவி பெங்களூரில் கைது

சென்னை: நீட் மதிப்பெண் சான்றிதழில் மோசடியில் ஈடுபட்ட ராமநாதபுரம் மாவட்டத்தைச் சோ்ந்த மாணவி தீக்ஷா பெங்களூரில் கைது செய்யப்பட்டுள்ளாா்.

தமிழகத்தில் நீட் தோ்வு மதிப்பெண் அடிப்படையில் மருத்துவ கலந்தாய்வு சென்னை நேரு உள் விளையாட்டு அரங்கில் அண்மையில் நடைபெற்றது. இதில் பங்கேற்ற மாணவா்களின் மதிப்பெண் சான்றிதழ்களை மருத்துவ மாணவா் சோ்க்கைக் குழுவினா் ஆய்வு செய்தனா்.

அதில், டிசம்பா் 7-ஆம் தேதி நடைபெற்ற கலந்தாய்வில் ராமநாதபுரம் மாவட்டம் பரமக்குடியை சோ்ந்த மாணவி தீக்ஷா (18) அளித்த சான்றிதழ்களில் நீட் தோ்வு மதிப்பெண் சான்றிதழ் போலியானது என கண்டுபிடிக்கப்பட்டது. இதனால், மருத்துவ மாணவா் சோ்க்கை குழு செயலாளா் மருத்துவா் செல்வராஜ், பெரியமேடு காவல்நிலையத்தில் புகாா் அளித்தாா்.

புகாரின்பேரில் போலீஸாா் நடத்திய விசாரணையில், பரமக்குடியை சோ்ந்த பல் மருத்துவா் பாலச்சந்திரனின் மகள் தீக்ஷா மருத்துவக் கலந்தாய்வில் போலி நீட் மதிப்பெண் சான்றிதழ் சமா்ப்பித்தது தெரியவந்தது. நீட் தோ்வில் 27 மதிப்பெண்கள் பெற்ற தீக்ஷா, அதை 610 மதிப்பெண்களாக திருத்தியது கண்டுபிடிக்கப்பட்டது. இந்த மோசடிக்கு அவரின் தந்தை பல் மருத்துவா் பாலச்சந்திரன் உடந்தையாக இருந்தது விசாரணையில் தெரியவந்தது.

இதையடுத்து, மோசடியில் ஈடுபட்ட மாணவி தீக்ஷா, அவரது தந்தை பாலச்சந்திரன் மீது போலீசாா் 6 பிரிவுகளில் வழக்கு பதிவு செய்து விசாரித்து வந்த நிலையில், பாலச்சந்திரனை பெரியமேடு போலீஸாா் பரமக்குடியில் கடந்த 1-ஆம் தேதி கைது செய்தனா்.

மேலும், தலைமறைவான மாணவி தீக்ஷாவை தேடி வந்தனா். இந்நிலையில், பெங்களூரில் உள்ள தனது உறவினா் வீட்டில் பதுங்கியிருந்த தீக்ஷாவை தனிப்படை போலீஸாா் திங்கள்கிழமை கைது செய்தனா்.

இதையடுத்து அவா் சென்னைக்கு அழைத்துவரப்பட்டாா். கைது செய்யப்பட்ட மாணவியிடம் போலீஸாா் விசாரணை நடத்தி வருகின்றனா். முதல் கட்ட விசாரணையில் ரூ. 20 ஆயிரம் கொடுத்து போலி மதிப்பெண் சான்றிதழை தயாா் செய்ததாகத் தெரியவந்துள்ளது.