தளா்வில்லா முழு பொதுமுடக்கம்: பொதுமக்கள்சொந்த ஊா்களுக்குச் செல்ல 4,500 பேருந்துகள்

தமிழகத்தில், திங்கள்கிழமை (மே 24) முதல் தளா்வில்லா முழு பொதுமுடக்கம் அமல்படுத்தப்படுவதையொட்டி, பொதுமக்கள் சொந்த ஊா்களுக்குச் செல்ல ஏதுவாக 4,500 பேருந்துகளை இயக்க போக்குவரத்துத் துறை அமைச்சா் ஆா்.எஸ்.ராஜகண்ணப்பன் உத்தரவிட்டுள்ளாா்.

இது தொடா்பாக துறைச் செயலா் சி.சமயமூா்த்தி சனிக்கிழமை வெளியிட்ட செய்திக்குறிப்பு: கரோனா நோய்த் தொற்றைத் தடுப்பதற்காக, மத்திய அரசின் வழிகாட்டுதலின்படி, கடந்த மே 10 முதல் 24-ஆம் தேதி வரையிலான இரு வாரங்களுக்கு மாநிலம் முழுவதும் தளா்வுகளுடன் கூடிய பொதுமுடக்கத்தை அமல்படுத்திட முதல்வா் மு.க.ஸ்டாலின் உத்தரவிட்டாா். இந்த பொதுமுடக்கம் தற்போது நடைமுறையில் உள்ளது.

பொதுமுடக்கம் நீட்டிப்பு: மேலும், கரோனா நோய்த் தொற்றின் தீவிரத்தைக் கட்டுக்குள் கொண்டு வரும் பொருட்டு, திங்கள்கிழமை (மே 24) காலை முதல் அடுத்த ஒரு வாரத்துக்கு தளா்வில்லா முழு பொதுமுடக்கம் அமல்படுத்துதல் குறித்த உத்தரவை, மருத்துவக் குழுவினா் உள்ளிட்டோருடன் நடைபெற்ற ஆலோசனைக்குப் பிறகு, சனிக்கிழமையன்று முதல்வா் பிறப்பித்தாா்.

பேருந்துகள் இயங்க அனுமதி: அந்த உத்தரவில் வெளியூா் செல்லும் பயணிகளின் நலன் கருதி, சனி (மே 22), ஞாயிறு (மே 23) ஆகிய நாள்களில், அரசு மற்றும் தனியாா் பேருந்துகளில் பயணிகள் வெளியூா் செல்வதற்கு அனுமதி வழங்குவதாக தெரிவித்துள்ளாா்.

4,500 பேருந்துகள்: அதன் அடிப்படையில், பொது மக்கள் தங்கள் சொந்த ஊா்களுக்குச் செல்வதற்கு வசதியாக போக்குவரத்துத் துறை அமைச்சா் ஆா்.எஸ்.ராஜகண்ணப்பன் அறிவுறுத்தலின்படி, தமிழ்நாடு அரசு போக்குவரத்துக் கழகங்களின் சாா்பில் சனி, ஞாயிறு ஆகிய இரு நாள்களுக்கு சென்னையில் இருந்து மற்ற ஊா்களுக்கு 1,500 பேருந்துகளும், மாநிலத்தில் முக்கிய நகரங்களான கோவை, திருப்பூா், சேலம், திருச்சி, மதுரை உள்ளிட்ட நகரங்களுக்கு இடையே 3,000 பேருந்துகளையும் இயக்கிட போக்குவரத்துத் துறை சாா்பில் ஏற்பாடு செய்யப்பட்டுள்ளது.

தேவைக்கேற்ப இயக்கப்படும்: மேலும், பயணிகள் கூடுதலாக வரும் பட்சத்தில் தேவையான பேருந்துகளை இயக்கவும் ஏற்பாடு செய்யப்பட்டுள்ளது.

குறிப்பாக சென்னை மற்றும் முக்கிய நகரங்களில் இரவு நேரத்திலும் பேருந்துகள் முழுமையாக இயக்கப்படும்.

அவ்வாறு இயக்கப்படும் அனைத்துப் பேருந்துகளும் தமிழக அரசு விதித்துள்ள நோய்த் தடுப்பு வழிக்காட்டு நெறிமுறைகளான, கட்டாய முகக்கவசம் அணிதல், கிருமிநாசினி பயன்படுத்துதல் போன்றவற்றைப் பின்பற்றியே இயக்கப்படும். இந்த விதிமுறைகளைப் பயணம் மேற்கொள்ள வரும் பொதுமக்களும் தவறாது பின்பற்றி பாதுகாப்பான பயணத்தை மேற்கொள்ளுமாறு கேட்டுக் கொள்ளப்படுகிறாா்கள். இவ்வாறு அதில் கூறப்பட்டுள்ளது.