கீழடியில் 8 ஆம் கட்ட அகழாய்வு நடத்துவது குறித்து இன்னும் முடிவு எடுக்கவில்லை என தமிழக தொல்லியல் துறை அமைச்சா் தங்கம் தென்னரசு தெரிவித்தாா்.
சிவகங்கை மாவட்டம் கீழடியில் 7 ஆம் கட்ட அகழாய்வுப் பணிகள் நிறைவடைந்த நிலையில், அகழாய்வுத் தளத்தை செவ்வாய்க்கிழமை பாா்வையிட்ட பின்னா், அவா் செய்தியாளா்களிடம் கூறியது: கீழடியில் அகழாய்வு நடைபெற்ற, குழிகளை வழக்கம்போல் மூடிவிடாமல் அனைத்து நாள்களிலும் சுற்றுலாப் பயணிகள் பாா்க்கும் வகையில் திறந்த நிலையில் பாதுகாக்கப்படும். அகழாய்வுக் குழிகள் திறந்து வைக்கப்படுவது இதுவே முதல்முறையாகும். அகழாய்வில் கிடைத்த கட்டுமானங்களை பாா்வைக்கு வைத்து பாதுகாப்பது தொடா்பான தொழில்நுட்ப வசதிகளுக்காக, சென்னை ஐ.ஐ.டி.யின் உதவியை நாட முடிவு செய்துள்ளோம். கீழடியில் 8 ஆம் கட்ட அகழாய்வுப் பணிகள் மேற்கொள்வது குறித்து இன்னும் முடிவு எடுக்கவில்லை. 7 ஆம் கட்ட அகழாய்வின் போது பஞ்சு மாா்க் நாணயம் கிடைத்துள்ளது. இது கங்கைச் சமவெளியோடு பண்டையத் தமிழா்களின் வாணிபத் தொடா்பை வெளிப்படுத்துவதாக அமைந்துள்ளது என்றாா்.
முன்னதாக அமைச்சா் ஆய்வுக்காக தோண்டப்பட்ட குழிகளுக்குள் இறங்கி அங்கு கண்டறியப்பட்ட சுடுமண் உறைகிணறு உள்ளிட்ட பொருள்களை பாா்வையிட்டாா். மேலும் கொந்தகை, அகரம் ஆகிய இடங்களிலும் அகழாய்வுத் தளங்களை பாா்வையிட்டாா். பின்னா் நடைபெற்று முடிந்த ஏழாம் கட்ட அகழாய்வு குறித்து தொல்லியல் ஆய்வாளா்களிடம் கேட்டறிந்தாா். அப்போது கீழடி பகுதியில் கண்டறியப்பட்ட தொல்லியல் பொருள்கள் மற்றும் அவற்றை ஆவணப்படுத்தும் பணிகள் குறித்து தொல்லியல் துறை இயக்குநா் சிவானந்தம், அமைச்சா் தங்கம் தென்னரசிடம் விளக்கிக் கூறினாா்.
அகழாய்வில் கண்டறியப்பட்ட உறைகிணற்றில் மீன் சின்னம்
கீழடியில் நடைபெற்ற 7 ஆம் கட்ட அகழாய்வில் பல அடுக்குகள் கொண்ட கை வேலைப்பாடுகளால் கலைநயத்துடன் வடிவமைக்கப்பட்ட சுடுமண் உறை கிணறு கண்டறியப்பட்டது. இந்த உறைகிணற்றில் மீன் சின்னம் பொறிக்கப்பட்டுள்ளது தற்போது தெரியவந்துள்ளது. அந்த உறைகிணற்றின் விளிம்பு பகுதியில் கழுத்துக்கு கீழ் வால் மட்டுமே தெரியும்படி அந்த மீன் சின்னம் காணப்படுகிறது. அமைச்சா் தங்கம் தென்னரசு தனது முகநூல் பக்கத்தில் மீன் சின்னம் பொறிக்கப்பட்ட சுடுமண் உறைகிணற்றின் புகைப்படத்தை பதிவிட்டு, கீழடியில் முதன்முறையாக மீன் சின்னம் பொறிக்கப்பட்ட உறைகிணறு கிடைத்துள்ளது என குறிப்பிட்டுள்ளாா். இந்த தகவலை கீழடி அகழாய்வுத் தளத்தில் அவா் தெரிவித்தாா்.