மக்களின் கருத்தை அறிந்தே எரிவாயு குழாய் பதிக்கும் பணி: தங்கம் தென்னரசு

மக்களின் கருத்தை அறிந்து, அவா்களின் முழு ஒத்துழைப்புடனே எரிவாயு குழாய் அமைக்கும் பணி நடைபெறும் என்று தொழில் துறை அமைச்சா் தங்கம் தென்னரசு கூறினாா்.

சட்டப்பேரவையில் தருமபுரியில் வயல்களில் கெயில் எரிவாயு குழாய் அமைக்கும் பணி நடைபெறுவது குறித்தும் விவசாயி ஒருவா் தற்கொலை செய்து கொண்டது குறித்தும் அரசின் கவனத்தை ஈா்த்து பாமக தலைவா் ஜி.கே.மணி, மாா்க்சிஸ்ட் சட்டப்பேரவைத் தலைவா் நாகை மாலி, இந்திய கம்யூனிஸ்ட் சட்டப்பேரவைத் தலைவா் தளி ராமச்சந்திரன், கொமதேக பொதுச்செயலாளா் ஈஸ்வரன் ஆகியோா் பேசினா்.

அப்போது தொழில்துறை அமைச்சா் தங்கம் தென்னரசு கூறியது:

சேலம் - கிருஷ்ணகிரி பகுதியில் கெயில் நிறுவனம் சாா்பில் எரிவாயு குழாய் அமைக்கும் பணி நடைபெற்று வருகிறது. அதில், பிரச்னை ஏற்பட்டு ஒரு விவசாயி தற்கொலை செய்துகொண்டாா் என்கிற செய்தி வந்துள்ளது.

பொதுவாக இந்தப் பகுதிகளில் நெடுஞ்சாலைகள் ஓரமாக எரிவாயு குழாய்களை அமைக்க வேண்டும் என்பதுதான் அரசின் நிலைப்பாடாக இருக்கிறது. சமீபத்தில் மத்திய அரசின் எண்ணெய் மற்றும் இயற்கை எரிவாயு அமைச்சகத்தின் செயலாளா், தமிழக அரசின் செயலாளா்கள், எண்ணெய் நிறுவனங்களின் பிரதிநிதிகள் எல்லாம் பங்கேற்கும் கூட்டம் நடைபெற்றது.

இந்தக் கூட்டத்தில் சாலை ஓரங்களில் எரிவாயு குழாய்களை அமைக்க வேண்டும் என்று வலியுறுத்தப்பட்டது. மக்களின் நலனைக் காக்கும் வகையில் அவா்களின் கருத்துகளை அறிந்து, அவா்களின் முழு ஒத்துழைப்புடனே எந்த ஒரு திட்டத்தையும் அரசு செயல்படுத்தும் என்றாா்.